Val landsliðsþjálfara í afrekshópa

Úlfar Jónsson landsliðsþjálfari í golfi hefur valið í afreks-og boðhópa GSÍ (A og B), að baki valinu liggja viðmiðunarreglur afreksstefnu GSÍ.  Afrekshópur A er skipaður þeim kylfingum sem sýndu hvað bestan árangur í sínum flokkum á seinasta tímabili og í boðshópi (B) verða kylfingar sem ekki skipa Team Iceland eða A hóp en falla þó undir viðmiðunarreglu. Í kringum áramót verða svo 2-6 kylfingar valdir úr A hópi til að skipa Team Iceland hópinn.

Að sögn Úlfars þá er hann ánægður með þann árangur sem náðist á árinu hér heima í mótaröðunum og einnig á mótum erlendis. Það sem stendur uppúr árangurslega í mótum erlendis er sigur Ragnars Más á Duke of York segir Úlfar. Hann fylgdi í fótspor Guðmundar Ágústs sem hafa sýnt að við höfum getu og möguleika til að sigra á sterkum mótum. Áttunda sætið hjá Axel á EM einstaklinga, sem er eitt allra sterkasta áhugamannamót heims, er frábær árangur. Margir hafa náð mjög góðum árangri í háskólamótum nú í haust, m.a. Valdís sem sigraði á sterku móti í september.

Breiddin hefur aukist hjá Íslenskum kylfingum segir Úlfar, fleiri kylfingar eru tæknilega góðir og geta náð lágum skorum. Hinsvegar á sama þróun sér stað í nágrannalöndunum, og nýjar þjóðir sem við höfum áður kannski ekki litið á sem golfþjóðir, eru að bætast við og koma fram með mjög góða kylfinga. Sem sagt, samkeppnin eykst! Þetta þýðir, að til að ná því markmiði að komast í fremstu mótaraðir atvinnumanna, þá þarf að vinna mjög fagmannlega á öllum sviðum.