Ragnheiður Jónsdóttir | desember. 3. 2011 | 15:00

Viðtalið: Ragnheiður Matthíasdóttir, GSS.

Það er Ragnheiður Matthíasdóttir, GSS, sem er viðmælandi Golf 1 að þessu sinni. Hún var endurkjörin gjaldkeri GSS á aðalfundi klúbbsins, sem haldinn var 24. nóvember s.l. Í gjaldkeratíð Ragnheiðar hefir GSS blómstrað en reksturinn sýndi 3 milljón króna hagnað á síðasta ári. Rekstrartekjur námu tæplega 22 milljónum króna og gjöld voru um 19 milljónir. Hér sýnir Ragnheiður á sér hina hliðina, en fyrir utan að vera góður gjaldkeri er hún frábær kylfingur. Svo eru ekki allir kylfingar sem eru með geimskip í pokanum. Hér fara spurningar Golf 1 og svör Ragnheiðar.

Fullt nafn: Ragnheiður Matthíasdóttir.

Klúbbur: GSS

Hvar fæddistu? Í Reykjavík.

Hvar ertu alin upp? Í Reykjavík.

Fjölskylduaðstæður? Er einhver í fjölskyldunni í golfi?  Ég er gift og á 3 syni. Maðurinn minn er í golfi, en ekki synir.

Hvenær byrjaðir þú í golfi? Fyrir 15 árum þegar ég eignaðist fyrsta golfsettið mitt. En það er aðeins síðustu 5 ár sem ég hef verið í þessu af krafti.

Hvað varð til þess að þú byrjaðir í golfi?  Maðurinn minn byrjaði … ég elti hann – Ég tók eftir hvað þetta tók mikinn tíma og því fór ég með.

Hvað starfar þú? Ég er grunnskólakennari í Árskóla.

Hvort líkar þér betur við skógar- eða strandvelli?  Strandvelli.

Hvort líkar þér betur holukeppni eða höggleikur? Holukeppni er meira spennandi.

Hver er uppáhaldsgolfvöllur/vellir á Íslandi? Fyrir utan Hlíðarendann (á Sauðárkróki) er það Kiðjaberg.

Hver er uppáhaldsgolfvöllur/vellir hvar sem er í heiminum?  Það er gaman að spila á Englandi og Skotlandi þó ég hafi farið mest til Spánar.

Hver er sérstæðasti golfvöllur sem þú hefir spilað á og af hverju? Ég man eftir einum Stoney Brooke við Orlando. Hann er spes fyrir þær sakir hversu langt er á millli teiga. Ég keyrði lengi dags og var að velta því fyrir mér hvort ég væri ekki bara komin út af vellinum.

Hvað ertu með í forgjöf?  11,9.

Hvert er lægsta skorið þitt í golfi og hvar/á hvaða velli náðir þú því?  Á Sauðárkróki laugardaginn fyrir 2 vikum (þ.e. í júní 2011) var ég á 82 höggum. Ég fékk 41 punkt og lækkun úr 13,4  í 11.9 í opnu móti.

Hvert er helsta afrekið þitt til dagsins í dag í golfinu?  Ég er ekki með nein afrek nema…  jú ég verð að segja frá móti,  sem skemmtilegt var að vinna. Þetta var boðsmót -ATRIX 2 daga lokað mót. Þetta var  það mót sem mig langaði mest að vinna og ég var búin að taka þátt 6 sinnum, þannig að þegar það loksins tókst var það persónulegt afrek.

Hvaða nesti ertu með í pokanum? Flatköku með hangikjöti.

Hefir þú tekið þátt í öðrum íþróttum?  Já, já ég hef verið í skokkinu og hleyp maraþon.

Hver er uppáhaldsmatur, uppáhaldsdrykkur, uppáhaldstónlist, uppáhaldskvikmynd og uppáhaldsbók? Uppáhaldsmaturinn minn er nautalund; uppáhaldsdrykkur: Sítrónu Egils Kristall; uppáhaldstónlist: melódískur jazz; uppáhaldskvikmyndin mín er Forest Gump og uppáhaldsbókin er Hreinsun eftir Sofi Oksanen.

Hver er uppáhaldskylfingurinn þinn nefndu 1 kven-og 1 karlkylfing?  Kvk.: Maria Hjorth.  Kk.: Lee Westwood.

Hvað er í pokanum hjá þér og hver er uppáhaldskylfan þín? Geimskipið  þ.e. dræverinn minn- Cobra járnasett – 60° Cleveland – 34° og 26° hybrid – Taylormade pútter. Kylfan sem er í uppáhaldi hjá mér er geimskipið mitt – Cobra dræverinn, sem ég keypti fyrir þó nokkru síðan úti í Kanada – Hausinn er stór og mér líður vel með hann og slæ langt með honum.

Ertu hjátrúarfull? Nei – reyndar eitt sem er ekki til góðs – Þegar mér gengur vel vil ég ekki að talað sé um það ef eitthvað er verið að ræða það, því þá held ég að allt gangi á afturfótunum eftir það.

Hvert er meginmarkmið í lífinu? Halda heilsu og velgengni fyrir mig og mína.

Hvað finnst þér best við golfið? Á golfvellinum á ég mínar bestu stundir. Það er bara það að leggja af stað í góðum félagsskap, þá líður mér best. Þetta er stórkostleg vellíðan sem erfitt er að skýra út.

Spurning frá síðasta kylfing (Gunnari Magnúsi Sandholt, GSS)  sem var í viðtali hjá Golf 1:

Hefur þú einhvern tímann verið meira en 6 tíma í golfi? Svar Ragnheiðar: Já, en það var ekki mín sök því ég spila mjög hratt – var í kvennamóti og hringurinn tók eitthvað aðeins lengur en 6 tíma.

Getur þú komið með spurningu fyrir næsta kylfing sem Golf 1 tekur viðtal við?   Hvað gerir þú þegar þú lendir í töf á golfvelli?