Ragnheiður Jónsdóttir | nóvember. 6. 2013 | 15:00

Viðtal við Birgi Leif um Lumine úrtökumótið

Íslandsmeistarinn okkar í höggleik, Birgir Leifur Hafþórsson, GKG, lék síðasta hringinn á II. stigi úrtökumóts á Evrópumótaröðinni á  golfvelli Lumine Golf & Beach Club, í Tarragona, Spáni, á 70 höggum, í dag.

Samtals lék Birgir Leifur á 3 undir pari, (70 71 70 70)  en það dugði því miður ekki til þess að komast á lokaúrtökumótið í Girona. Það munaði aðeins 1 höggi að hann kæmist í bráðabana um sæti á lokaúrtökumótinu!

Golf 1 tók eftirfandi viðtal við Birgi Leif, sem kominn var út á flugstöð og að innrita sig inn í flug á leið heim til Íslands.  Engu að síður svaraði Birgir Leifur eftirfarandi spurningum:

Golf 1:  Hvað komust margir kylfingar frá Lumine á lokaúrtökumótið í Girona – nú segir á vef Evrópumótaraðarinnar að búist sé við u.þ.b. 20 af hverju þessara fjögurra II. stigs móta á Spáni, samtals 80 keppendur komist áfram, en það er ekki nákvæm tala því ákvörðun um það, segir á síðunni, eigi að taka nú á lokadegi úrtökumótanna.  Þannig að spurningin er: Veistu hversu margir komust áfram á lokaúrtökumótið frá Lumine eru það 18 eða líka þeir 3, sem höfnuðu í 19. sætinu m.ö.o. munar 1 eða 2 höggum að þú kæmist áfram?

Birgir Leifur:  Það eru 18 sem komast beint áfram – Síðan spila þessir 3 upp á varasæti. – Skv. síðustu árum hefði þetta eina högg sem munaði leitt mig í bráðabana um varasæti, en maður vill frekar vera öruggur og ég hefði verið öruggur áfram hefði ég spilað tveimur höggum betur. 

Golf 1:   Nú laukst þú keppni í 22.-29. sæti á II. stigi  úrtökumótsins fyrir Evrópumótaröðina,  á Lumine golfstaðnum og fórst upp um heil 19 sæti á lokahringnum, en ert á svipuðu skori og alla hina 3 mótsdagana, hvernig skýrir þú svona stórt stökk upp skortöfluna?

Birgir Leifur:  Það er meira stress síðasta daginn, menn vita ekki skorið og eru sífellt með hugann við það. Dagurinn í gær var gríðarlega erfiður  – 17 holur voru spilaðar í mjög miklum vindi. Ég myndi vilja hafa klárað – þetta var klárlega þeim í hag sem áttu eftir fleiri holur og spiluðu í ágætis veðri í dag.  Veðrið spilaði þarna inn í.  Ég vildi að mótið hefði klárast í gær. 

Golf 1:  Ertu ánægður með frammistöðu þína í Lumine mótinu?

Birgir Leifur:   Ég er ánægður með margt -Þetta er  hörð samkeppni og maður þarf að spila af hörku. Ég er  virkilega ánægður með hugafarið; ég var aldrei banginn en skildi eftir 2-3 fullauðveld högg á hverjum hring,  sem ég missti. En þetta er bara hörð samkeppni. Það þarf að vera á tánum og spila af hörku.

Golf 1:  Finnst þér að eitthvað hefði mátt fara betur í leik þínum svona þegar litið er á mótið í heild?

Birgir Leifur:  Ég var að gera allt nokkuð vel – mín vandamál eru vippin – en ég var ekki að vippa mikið. Það voru helst nokkrar ákvarðanir í kylfuvali sem gerðu það að verkum að ég var oft í erfiðum stöðum og það kostaði. 

Golf 1:  Hvernig fannst þér Lumine völlurinn – einhverjar uppáhaldsholur og einhverjar sem þér þóttu erfiðari?

Birgir Leifur:  Það voru nokkrar holur, sem voru erfiðar –  þetta er ekkert sérlega langur völlur-  þó að  par-3 holurnar séu langur og nokkrar par- 4 holur líka – en hann er rosalega skemmtilegur – Maður fær aldrei leið á honum og ég  myndi vilja koma hingað aftur, ekki til að keppa, heldur í golfferð.  Sumir vellir eru einfaldlega hannaðir þannig að maður man eftir þeim. 

Golf 1: Hvernig er líðanin nú þegar ljóst er að þú kemst ekki á lokaúrtökumótið?

Birgir Leifur:  Auðvitað er ég mjög svekktur, en maður verður bara að hrista þetta af sér og setja brjóstkassann út – Þetta er hluti af því að vera í íþróttum. 

Golf 1:  Færðu einhvern þátttökurétt á Áskorendamótaröðinni fyrir að komast á II. stig úrtökumótsins?

Birgir Leifur:  Nei, ég hefði þurft að komast á lokaúrtökumótið. 

Golf 1:  Hvað tekur við hjá þér núna?

Birgir Leifur:  Það er Ameríka næst og bara að tækla það. 

Golf 1:  Er eitthvað sem þú vildir taka fram að lokum?

Birgir Leifur: Ég myndi vilja þakka Úlfari Jónssyni fyrir hjálpina – Hann var kylfusveinninn minn og gaf góð ráð. Það er alltaf gott að hafa góða menn sér við hlið.