Var val landsliðsþjálfara á karlalandsliðinu rétt? Hvað með Arnór Inga og Rúnar?

Nú rétt í þessu var tilkynnt hverjir skipa íslenska karlalandsliðið sem mun leika fyrir Íslands hönd í forkeppni fyrir Evrópumót landsliða sem fram fer á Hvaleyrarvelli 12.-14. júlí næstkomandi.  Liðið er skipað Ólafi Birni Loftssyni, NK, Kristjáni Þór Einarssyni, GK, Haraldi Franklín Magnús, GR, nýbökuðum Íslandsmeistara í holukeppni, Andra Þór Björnssyni, GR, Guðmundi Ágúst Kristjánssyni, GR og Guðjóni Henning Hilmarssyni, GKG.

Úlfar Jónsson er ekki öfundsverður af því að setja saman 6 manna karlalandsliðið, með svo mikla hæfileikamenn að velja úr.  Þó vekur val hans á liðinu nokkra furðu einkum m.t.t. nýlegs æfingamóts, sem haldið var sérstaklega í tilefni af forkeppninni, en það fór fram á Hvaleyrarvelli.

Á umræddu 27 holu æfingamóti hlutu eftirfarandi verðlaun veitt  fyrir besta skor:
1. Arnór Ingi Finnbjörnsson 71-34; -2
2.-3. Haraldur Franklín 69-38; par
2.-3. Rúnar Arnórsson 73-34; par

Verðlaun veitt fyrir tölfræði:
Flestar hittar brautir: Arnór Ingi 61%
Flatir í tilætluðum höggafjölda: Arnór Ingi og Rúnar: 71%
Fæst pútt á flötum hittum í tilætluðum höggafjölda: Haraldur Franklín 1,65
Scrambling (bjarga pari eftir missta flöt): Arnór Ingi: 93%

Skv. ofangreindu voru Rúnar og Arnór Ingi að standa sig best á æfingamótinu, sem og Haraldur Franklín, sem spilaði sig inn í liðið.

Rúnar þekkir auk þess hvern krók og kima á Hvaleyrinni og varð í 2. sæti í Meistaramóti GK 2011, á eftir margföldum Íslandsmeistara Björgvini Sigurbergssyni, sem eins og Rúnar þekkir heimavöll sinn betur en nokkur annar. Auk þess varð Rúnar  í 4. sæti á nýlegu Íslandsmóti í holukeppni, á eftir Birgi Leif, Hlyn Geir og Haraldi Franklín.

Arnór Ingi hefir líka verið að spila frábært golf að undanförnu. Fyrir utan að leika best allra í ofangreindu æfingamóti er skemmst að minnast að hann var á besta skori á Opna Þjóðhátíðarmótinu á Seltjarnarnesi og vann sér þar með inn þátttökurétt í Einvíginu á Nesinu.

Úlfar hefir eflaust sínar ástæður fyrir valinu, en með vali sínu, umfram þá Rúnar og Arnór, leggur hann pressu á liðið að standa sig.