Vala Torfadóttir fór holu í höggi!!!

Vala Torfadóttir, GO og GKB,  fór holu í höggi á 13. flöt Strandarvallar á Hellu, nú á Páskunum.  Golf 1 spurði Völu nánar út í draumahöggið, en ítarlegra viðtal birtist við þennan nýjasta félaga Einherjaklúbbsins hér á Golf 1 á morgun.

Nú fórstu holu í höggi á Strandarvelli, mannstu á hvaða degi það var og af hvaða tilefni þú varst að spila völlinn (var mót eða bara verið að spila ánægjunnar vegna?) Þetta var á Skírdag 28.mars sl., ég var nýkomin í páskafrí og ætlaði svo sannarlega að njóta þess að spila í góða veðrinu á Íslandi með vinum mínum.

Hverjir voru í holli með þér? Eiginmaðurinn og vinir okkar Ásthildur Ragnarsdóttir og Jón Rúnar Halldórsson.

Er þetta í fyrsta skipti sem þú ferð holu í höggi? Já.

Hvaða kylfu notaðir þú þegar þú slóst höggið góða? Það var mótvindur þannig að ég ákvað að taka 3.tréð.

Nú er 13. brautin á Strandarvelli ekki auðveldasta par-3 holan – sástu boltann fara ofan í holu? Nei, en þetta leit vel út og þegar við sáum að boltinn var ekki á flötinni var byrjað á að athuga ofan í holuna, en ekki fyrir utan eins og maður gerir nú oftast.

Hvernig var tilfinningin þegar þú gerðir þér grein fyrir að boltinn hefði lent ofan í holu? Ótrúleg og þó svo að hollið mitt hafi byrjað að klappa þorði ég ekki að trúa því fyrr en ég leit ofan í holuna sjálf!

Golf 1 óskar Völu innilega til hamingju með ásinn!!!