Valdís Þóra úr leik á Opna bandaríska kvenrisamótinu – Stóð sig vel!!!

Nú hefir tveimur íslenskum kvenkylfingum, fyrstum Íslendinga tekist að spila á risamóti.

Kvenrisamótin eru 5 og lék Ólafía Þórunn Kristinsdóttir, GR, fyrst Íslendinga á risamóti í golfi en það var KPMG risamótið.

Valdís Þóra Jónsdóttir, GL, varð 2. íslenskra kvenna til að spila á risamóti og það var Opna bandaríska kvenrisamótið (US Women´s Open).

Þetta er hvernig sem á það er litið glæsilegur árangur íslenskra kvenkylfinga og auðvitað þeirra Ólafíu Þórunnar og Valdísar Þóru – þær báðar eru alveg hreint ótrúlegar!!!

En það eru margir áfangar eftir fyrir íslenska kylfinga. Íslenskum karlkylfingi á eftir að takast að komast inn á risamót. Næsta skref hvað íslensku kvenkylfingana varðar er að komast í gegnum niðurskurð á risamóti og svo væntanlega kemur einhvern tímann sá dagur að við sjáum fleiri en einn Íslending spila í risamóti; verða meðal efstu 30, efstu 20; efstu 10 og svo sigra!!!

En Ólafía Þórunn og Valdís Þóra hafa brotið blað og sýnt öðrum að þetta er hægt; við Íslendingar eigum fullt erindi með að vera að spila meðal þeirra allra bestu í heimi.

E.t.v. eigum við líka eftir að sjá íslenskan kylfing sigra í fyrstu tilraun sinni á risamóti – þetta á allt eftir að koma.

Valdís Þóra stóð sig eins og hetja. Það að komast ekki í gegnum niðurskurð í 1. skipti á risamóti er ekkert til að skammast sín fyrir. Hún spilaði í RISAMÓTI dagana 13.-14. júlí 2017!!! Við erum öll svo stolt af Valdísi Þóru.

Valdís Þóra lék á samtals 9 yfir pari, 153 höggum (78 75). Niðurskurður var miðaður við að spila 2 hringi á samtals 2 yfir pari eða betra og Valdís Þóra því nokkuð frá að fá að spila um helgina.

Valdís Þóra bætti sig eftir því sem líða fór á mótið og nú er bara að reyna að komast inn á fleiri risamót – við fylgjum spennt með…

Hér má sjá stöðuna á Opna bandaríska kvenrisamótinu SMELLIÐ HÉR: 

Efst í hálfleik í Opna bandaríska kvenrisamótinu er kínverski kylfingur Shanshan Feng; en hún hefir spilað fyrstu tvo hringina í mótinu á samtals 8 undir pari, 136 höggum (66 70).

Öðru sætinu deila 3 kylfingar frá S-Kóreu; áhugamaðurinn óþekkti Hye Jin Choi; Jeungeun Lee og Amy Yang; allar á 6 undir pari.

Enn einn s-kóreansku kylfingur, Seon Woo Bae er síðan ein í 5. sæti (á samtals 5 undir pari) og 4 kylfingar deila 6. sætinu þ.á.m. Solheim Cup kylfingurinn frá Spáni, Carlota Ciganda (allar á 4 undir pari).

Heimsþekktir kvenkylfingar eins og Brooke Henderson og fyrrum nr. 1 á heimslistanum Lydia Ko eru síðan meðal 4 kylfinga sem deila 10. sætinu á samtals 3 undir pari.