Úrtökumót LET: Guðún Brá á +2 e. 1. dag í Marokkó

Guðrún Brá Björgvinsdóttir úr Keili hóf keppni í dag á lokaúrtökumótinu fyrir LET Evrópumótaröðina. Guðrún Brá komst örugglega í gegnum fyrra stig úrtökumótsins sem fór einnig fram í Marókkó líkt og lokaúrtökumótið.

Þetta er sjötta árið í röð þar sem lokúrtökumótið fer fram í Marokkó og úrslitin ráðast þann 20. desember.

Alls eru 106 keppendur frá 18 þjóðum sem keppa á tveimur völlum, Amelkis og Palm Golf Ourika Marrakech. Alls eru leiknir fimm 18 holu hringir og komast 60 efstu áfram á lokahringinn. Alls komast 25 efstu á LET Evrópumótaröðina. Fimm efstu komast í styrkleikaflokk 5b og þær sem enda í sætum 6.-25. verða í styrkleikaflokki 8a.

Þetta er í fyrsta sinn sem Guðrún Brá reynir fyrir sér á úrtökumótinu fyrir LET. Alls eru 53 leikmenn á úrtökumótinu sem eru í fyrsta sinn á lokaúrtökumótinu.

Í dag lék Guðrún Brá á 2 yfir pari, 74 höggum og er sem stendur T-68. Efst eftir 1. dag er þýski kylfingurinn Louisa Dittrich á 6 undir pari, 66 höggum.

Sjá má stöðuna á lokaúrtökumótinu með því að SMELLA HÉR: 

Guðrún Brá er fjórði íslenski kylfingurinn sem kemst í lokaúrtökumótið hjá LET Evrópumótaröðinni. Ólöf María Jónsdóttir braut ísinn fyrst allra á sínum tíma með því að tryggja sér keppnisrétt á LET. Ólafía Þórunn Kristinsdóttir og Valdís Þóra Jónsdóttir fylgdu síðan í kjölfarið og Guðrún Brá gæti því orðið fjórða íslenska konan sem tryggir sér keppnisrétt á mótaröð þeirra bestu í Evrópu.