Úrtökumót f. Evróputúrinn: Birgir Leifur T-102 e. 1. dag á lokaúrtökumótinu!

Birgir Leifur Hafþórsson, atvinnukylfingur úr GKG, lék í dag 1. hring á lokaúrtökumótinu fyrir Evrópumótaröðina.

Mótið hefir á undanförnum árum alltaf farið fram á PGA Catalunya vellinum, í Girona á Spáni en að þessu sinni eru spilaðir tveir vellir Lumine golfstaðarins; Hills og Lakes vellirnir.

Birgir Leifur hóf leik á Lakes vellinum í dag.

Hann kom í hús á 2 yfir pari, 73 höggum; fékk 2 fugla, 12 pör og 4 skolla og deilir 102. sætinu með 18 öðrum kylfingum, en 156 kylfingar taka þátt í mótinu.

Í gær ritaði Birgir Leifur á facebook síðu sína:

„Á morgun (innskot Golf 1: Í dag) byrjar síðasta stig úrtökumóts fyrir European tour. Það er sérstaklega gaman að koma hingað með það veganesti að vera búinn að tryggja sig inn á European tour fyrir komandi tímabil með árangri mínum í sumar á Challenge tour. En með góðum árangri hér get ég bætt stöðu mína örlítið á European tour og fengið fleiri mót. Þannig að nú er bara hlaða byssurnar og ná í slatta af fuglum næstu daga.“

Fjölmargir nú- og fyrrverandi kylfingar á Evrópumótaröðinni taka þátt í mótinu, sem er því geysisterkt og nægir þar t.a.m. að nefna þann sem er efstur, Gary Stal, en hann lék á 7 undir pari, 64 höggum.

Sjá má stöðuna á Lumine með því að SMELLA HÉR: