Úrslit í Sveitakeppni GSÍ – 3. deild karla – GHR og GÖ spila í 2. deild á næsta ári

Sveitir 3. deildar karla spiluðu í Öndverðarnesinu. Í 3. deild í ár voru sveitir GG, GHR,GÍ, GMS GN, GOB, GSG og heimamenn í GÖ.

Það var sveit GHR, skipuð þeim Andra Má Óskarssyni, klúbbmeistara GHR 2012, Einari Long, Jóni Þorsteini Hjartarsyni og Þóri Bragasyni sem kom sveitinni upp í 2.deild nú á afmælisári GHR, en klúbburinn fagnar 60 ára afmæli sínu í ár. Úrslitaleikurinn við GÖ vannst sannfærandi 3-0 (eða m.ö.o. fjórmenningurinn og báðir leikir í tvímenningunum). Sveit GÖ mun hins vegar einnig spila í 2. deild á næsta ári.

Sveit heimamanna í GÖ spilar í 2. deild á næsta ári. Mynd: Facebook síða GÖ

Sveit Golfklúbbs Grindavíkur varð í 3. sæti vann sveit GN með 2 1/2 vinningi gegn 1/2 vinningi Norðfirðinga. Sá sem halaði inn 1/2 vinninginn fyrir GN var Guðgeir Jónsson, en það gerði hann í leik sínum við Jón Júlíus Karlsson, GG.

Golfklúbburinn Mostri í Stykkishólmi (GMS) hafði betur í viðureigninni við Golfklúbb Sandgerðis (GSG) 2-1 og Golfklúbbur Ísafjarðar (GÍ) lagði Golfklúbb Bakkakots (GOB) 2-1. Eftir þessi úrslit var ljóst að GOB væri fallið í 4. deild en GÍ, GMS og GSG voru jöfn að stigum og varð því að fara fram bráðabani, sem spilaður var í formi fjórmennings þar sem allar sveitir sendu 2 leikmenn. Lið GSG fékk skolla á fyrstu holu bráðabanans en lið GÍ og GMS par og því féll GSG.

Það eru því sveitir GOB og GSG, sem spila í 4. deild á næsta ári.

Úrslit í 3. deild karla var eftirfarandi:

1. sæti Golfklúbbur Hellu
2. sæti Golfklúbbur Öndverðarnes
3. sæti  Golfklúbbur Grindavíkur
4. sæti  Golfklúbbur Norðfjarðar
5. sæti Golfklúbbur Ísafjarðar
6. sæti  Golfklúbburinn Mostri
7. sæti  Golfklúbbur Sandgerðis
8. sæti  Golfklúbbur Bakkakots

Sjá má nokkrar myndir frá Sveitakeppni GSÍ – 3. deild karla í Öndverðarnesinu með því að SMELLA HÉR: