Sigursveit GR 2012.
Ragnheiður Jónsdóttir | ágúst. 13. 2012 | 12:00

Úrslit í Sveitakeppni GSÍ – 1. deild kvenna – GR-ingar Íslandsmeistarar 3. árið í röð!!!

Sveitir í 1. deild kvenna spiluðu á Garðavelli á Akranesi. Sveitir sem voru í 1. deild í ár eru: GA, GK, GKG, GKJ GR, GS, GVG og NK.

Það voru sveitir GR og GK sem spiluðu til úrslita og má með sanni segja að sterkustu kvenkylfingar landsins hafi mættst í þeim leik, Margfaldir Íslandsmeistarar og klúbbmeistarar í báðum sveitum.

Eftir leiki í tvímenningunum var allt jafnt. Tinna Jóhannsdóttir, GK vann Berglindi Björnsdóttur, GR 5&4 og Guðrún Brá Björgvinsdóttir, GK vann Sunnu Víðisdóttur 3&2.

Í liði GR vann Ólafía Þórunn Kristinsdóttir, Önnu Sólveigu Snorradóttur, GK 3&2 og Ragnhildur Sigurðardóttir, GR vann Signýju Arnórsdóttur, GK 1&0.

Úrslitin réðust í fjórmenningnum og það á síðasta púttinu eins og vera ber í æsispennandi úrslitaleik.  Það voru Guðrún Pétursdóttir og Hildur Kristín Þorvarðardóttir, GR sem spiluðu gegn Högnu Kristbjörgu Knútsdóttur og Ólöfu Maríu Jónsdóttur, GK. Á lokaholunni, en leikurinn fór allt á 19. holu setti Guðrún Pétursdóttir, GR niður 8 metra pútt og sigurinn lenti GR-meginn – úrslitin 3&2. Þess mætti geta að þetta er í 14. sinn af 29 sem Ragnhildur Sigurðardóttir, GR, verður Íslandsmeistari í Sveitakeppni GSÍ, með sveit GR.

Guðrún Pétursdóttir, hetja GR-inga!!! Mynd: Golf 1.

Í leik um 3. sætið vann GKG sveit NK með 3, 5 vinningi gegn 1,5. Í leik um 5. sætið vann GS, sveit GKJ 3&2 og í leik um 7. sætið vann GA, sveit GVG og spila báðar sveitirnar þ.e. GA og GVG í 2. deild á næsta ári.