Tiger með nýjan auglýsingasamning við Rolex

Tiger Woods snýr aftur á PGA mótaröðina með nýjan auglýsingasamning upp í ermina, að þessu sinni við Rolex. (Mörgum er e.t.v. í fersku minni að svissneski úraframleiðandinn Tag Heuer rifti samningnum við Tiger eftir að upp komst um framhjáhaldsskandala hans – en einn úraframleiðandi kemur bara í annars stað! )

Þetta er fyrsti stóri auglýsingasamningurinn sem Tiger fær í meira en 2 ár. Tag Heuer hætti samstarfi við Tiger fyrir 2 mánuðum. En Tiger mun bara verða alheimssendiherra fyrir annað fyrirtæki með bækistöðvar í Sviss.

Ekki voru gefnir upp skilmálar á samningnum við Rolex, en talið er að gildistími samningsins sé til lengri tíma en 5 ára.

Fram kom í fréttatilkynningu frá Rolex að fyrirtækið telji að Tiger eigi enn langan farsælan feril framundan. Tiger, sem hefir sigrað á 14 risamótum og 82 mótum um heim allan, hefir ekki sigrað í 2 ár. Hann er á þeim tíma búinn að missa 5 risaauglýsingasamninga vegna framhjáhaldsins, sem leiddi að lokum til lögskilnaðar hans.

Tiger hefur leik á morgun á Frys.comOpen (og er spenningur að sjá hann aftur spila vestra gríðarlegur og reyndar mikill áhugi um allan heim á mótinu.)