Tierra del Sol golfvöllurinn á Arúba

Arúba er ein af þremur ABC-eyjum (hinar eru Bonaire og Curaçao), sem saman mynda Leeward Antilla-eyjar, sem heyra undir Holland. Arúba er 33 km að lengd og 27 km undan norðurströnd Venezúela, syðst í Karabíska hafinu.

Tierra del Sol-golfstaðurinn var opnaður fyrir 21 ári. Hann er í eigu Hyatt samsteypunnar. Á golfstaðnum eru einbýli, sem bæði eru til sölu eða leigu; hótel, veitingastaðir, golfvöruverslun, búningsherbergi, heilsulind, heilsuræktarstöð, 2 sundlaugar og 8 tennisvellir.

Frá golfvelli Tierra del Sol á Arúba

Við hönnun golfstaðarins var haft samráð við umhverfisverndarsamtök til þess að vernda og valda sem minnstu raski á fuglalífi staðarins, en m.a. er varpstöð sjaldgæfrar uglu (burrowing owl), sem er í útrýmingarhættu á miðjum golfvellinum. Mikið hefur ennfremur verið lagt upp úr að vernda aðrar dýra-blóma-trjá- og kaktusategundir en mjög fjölbreyttar tegundir kaktusa gefur að finna á Arúba. Áberandi á vellinum eru grænir, villtir páfagaukar og eðlur og salamöndrur, sem eru í sólbaði á klettum við völlinn.

Tierra del Sol golfvöllurinn er 18 holu, 6228 m langur par-71 völlur, hannaður af Robert Trent Jones II. Hann er jafnframt eini 18 holu völlurinn og stolt Arúba. Við völlinn gefur að finna flóðlýst æfingasvæði og sérstaka pútt- og chipp-æfingavelli.

Tierra del Sol golfvöllurinn er í norðvestur horni Arúba. Vindur af norðaustri gerir allt spil á vellinum notalegt, jafnvel yfir heitasta tíma dagsins. Svo undarlegt sem það hljómar þá finnst mörgum tilfinningin svipuð þeirri að vera að spila í Skotlandi eða í Scottsdale í Arizona í Bandaríkjunum, þegar þeir slá af 1. teig á Tierra del Sol.

Á golfvellinum er 5 frábærar par-3 brautir, þar sem nota verður allt frá 8 járni til hybrid-kylfa. Síðla dags er vinsælt að spila 3. brautina, sem er fyrir neðan Californíu-vitann (sjá mynd) og veitir óviðjafnanlegt útsýni yfir sólarlag í Karabíska hafinu.

Par-5 brautirnar á Tierra del Mar þykja ekki ýkja langar – sú lengsta er 549 metra – en í raun eru þær “lengri” vegna þess að spilað er á móti vindi. Það þykir t.a.m. gott að ná pari á 12. braut, sem er 438 metra. Skemmtilegasta par-5 brautin er þó 14. brautin sem er 488 metra hundslappar-braut.

Fyrir þá sem ekki spila golf er tilvalið að slaka á undir slútandi greinum divi-divi trésins eða fara í rómantíska tunglskinsgöngu á ströndinni, eftir “erfiðan” dag við sólböð á sömu strönd.

Heimild: Golfweek