Það borgar sig að þekkja golfreglurnar – Kristján Geir vann ferð til Montecastillo á vegum Heimsferðar í spurningaleik Varðar

Það getur borgað sig að þekkja golfreglurnar!

Vinningshafinn í spurningaleik Varðar og Golfsambandsins var dreginn út nú fyrir skemmstu.

GSÍ og Vörður þakka frábæra þátttöku í Regluverði, spurningaleik Golfsambands Íslands og Varðar. Leiknum er nú lokið og tóku rúmlega 5.000 manns þátt þetta sumarið. Það er um fimmtungi fleiri en í fyrra.

Í leiknum gafst þátttakendum færi á að kanna þekkingu sína á golfreglunum og gátu þeir sem stóðust prófið fengið gull-, silfur- eða bronsverðlaun. Um 2.000 þátttakendur hlutu gullverðlaunin og sýndu með því yfirburða þekkingu á golfreglunum.

Sigurvegari Regluvarðar þetta sumarið er Kristján Geir Guðmundsson. Hann hlýtur að launum magnaða haustgolfferð með Heimsferðum fyrir tvo á Montecastillo golfsvæðið á Spáni. Þar getur hann látið reyna á regluþekkinguna við bestu aðstæður á þessu frábæra golfsvæði á Suður-Spáni.

GSÍ og Vörður þakka  öllum sem tóku þátt kærlega fyrir og minna alla golfáhugamenn á að kynna sér golfreglurnar. Þeir sem ekki eiga eintak af af Golfreglubókinni ættu að næla sér í hana. Bókin passar vel í golfpokann en svo er líka gott að rýna í hana þegar ekki er lengur fært á golfvöllinn.

GSÍ og Vörður vona að þú hafir átt ánægjulegar stundir á golfvellinum í sumar.