Sögulegt: Caroline Hedwall bæði nýliði og nú kylfingur ársins á LET

Fyrrum liðsmaður Oklahoma State háskólans og félagi Eyglóar Myrru Óskarsdóttur hefir verið útnefnd kylfingur ársins á Evrópumótaröð kvenna, Ladies European Tour (skammst. LET) árið 2011.

Caroline er sú fyrsta í sögu LET til þess að hljóta báða titlana: nýliði ársins og kylfingur ársins á sama keppnistímabili.

Caroline, sem kemur frá  Barsebäck í Svíþjóð spilaði í 20 mótum Evrópuraðar kvenna í ár.  Hún var 3. á peningalista LET á eftir Ai Miyazato (sem spilaði bara í 2 mótum á túrnum) og hinnar frábæru Melissu Reid frá Englandi (sem vann 2 sinnum á túrnum 2011).

Eftir að sigra Q-school með 9 högga mun á næstu tók Caroline þátt í fyrsta mótinu sínu sem atvinnumaður á  the Australian Ladies Professional Golf Tour og vann the New South Wales Open. Alls sigraði Caroline 4 sinnum á LET nýliðaár sitt 2011 og var auk þess lykilmaður í hinu sigursæla Solheim Cup liði Evrópu í Killeen Castle á Írlandi.

Á næsta keppnistímabili mun Caroline keppa bæði á LPGA og Ladies European Tour – en nú um jólin hvílir hún sig m.a. í skíðafríi með fjölskyldu sinni.

Frábært hjá Caroline … og það verður gaman að fylgjast með henni á næsta keppnistímabili!