Sigríður Svavarsdóttir, formaður GSS, fór holu í höggi á Spáni!!!

Þann 8. júní sl. fór Sigríður Svavarsdóttir, formaður Golfklúbbs Sauðárkróks Skagafirði (skammst. GSS), holu í höggi, í Girona, á Spáni.

Hún var í holli með félögum sínum úr GSS: Ingileif, Sævari og Kristjáni Bjarna.

Sigríður fékk ásinn á 12. braut á skógarvellinum (Forrest) á Empordá, í Girona.

Hún notaði hybrid fjarka á brautinni, sem var 107 m.

Tilfinningin var einstök, enda hefur hún aldrei áður farið holu í höggi.

Hún var að taka tíið upp þegar hún heyrði fagnaðarhróp spilafélaga sinna. Hollið fagnaði með því að skála í freyðivíni að loknum hringnum.

Boltinn góði, sem gaf ásinn, er nú kominn upp í hillu í eldhúsi, í klúbbhúsinu, á Króknum.

Golf 1 óskar Sigríði innilega til hamingju með ásinn og inngönguna í Einherjaklúbbinn!!!!

PS: Á golfstað félaganna fjögurra fór fram mót vikunnar á Áskorendamótaröð Evrópu og voru þau 4 því dugleg að hvetja Harald Franklín Magnús áfram á Empordá Challege, en hann lauk keppni á mótinu í dag (12. júní ) og varð T-39, eflaust ekki síst vegna stuðnings fjórmenninganna!