Saga og Patrekur hefja leik á Duke of York mótinu í dag

GR-ingarnir Patrekur Nordquist Ragnarsson og Saga Traustadóttir hefja leik í dag á einu sterkasta unglingamóti sem fram fer á þessu ári. Þau keppa fyrir Íslands hönd á The Duke of York meistaramótinu sem fram fer á hinum sögufræga Royal Birkdale. Keppnin hefst í dag og verða leiknir þrír hringir og er lokakeppnisdagurinn á föstudaginn.

Opna breska meistaramótið hefur margoft farið fram á þessum velli en síðast fór mótið fram á vellinum 2008 og mótið fer fram á þessum velli á næsta ári.

Alls eru 51 kylfingar sem taka þátt og koma þeir frá 28 þjóðum. Þetta er í fyrsta sinn sem þetta unglingamót fer fram á þessum velli. Íslendingar hafa átt góðu gengi að fagna á þessu móti en þrír íslenskir kylfingar hafa fagnaði sigri á þessu sterka móti, Guðmundur Ágúst Kristjánsson (GR) 2010, Ragnar Már Garðarsson (GKG) 2012 og Gísli Sveinbergsson (GK) 2014.

Hægt er að fylgjast með gangi mála á Duke of York með því að SMELLA HÉR: 

Texti: GSÍ