Ragnheiður Jónsdóttir | september. 26. 2021 | 08:00

Ryder Cup 2021: Stefnir í stærsta Ryder Cup sigur bandarísks liðs

Lið Bandaríkjanna í Rydernum hefir mikla yfirburði eftir 4 fyrstu viðureignir álfanna og staðan er nú 11-5 fyrir tvímenningsleikina, sem fara fram í dag.

Þetta er í fyrsta sinn í sögunni í Ryder bikars keppninni að lið Bandaríkjanna hefir verið með meira en 5 vinnings mun fyrir tvímenninginn.

Frá árinu 1979 þegar liði Breta&Íra var breytt í lið Evrópu, hafa lið í keppninni þrívegis sigrað með 9 vinninga mun, en þessir sigrar með 9 vinninga mun eru met, sem eiga á hættu að falla í dag.

Ryder Cup lið Bandaríkjanna 1981

Lið Bandaríkjanna sem sigraði 1981 í Walton Heath er almennt álitið vera eitt sterkasta lið, sem Bandaríkjamenn hafa átt í Rydernum.

Það lið sigraði lið Evrópu 18,5-9,5, í viðureign liðanna 1981.

Meðal liðsmanna liðs Bandaríkjanna það ár voru Jack Nicklaus, Lee Trevino, Tom Watson, Bill Rogers, Larry Nelson – reyndar var Bruce Lietzke sá eini í liðinu, sem aldrei sigraði á risamóti.

Allt var í uppnámi Evrópumegin því fyrirliði liðsins John Jacobs gat ekki valið Seve Ballesteros í liðið, því Seve átti í deilum við Evróputúrinn vegna ógreiddra launa fyrir að mæta í mótum (ens. appearance money).

Hinir tveir sigrarnir sem unnust með 9 vinnings mun voru sigrar liðs Evrópu í Rydernum 2004 og 2006.