Robert Allenby eltur af apa á golfvelli

Ástralski kylfingurinn Robert Allenby sagði nú fyrr í dag að hann hefði rekist á heldur óvenjulegan keppinaut þegar hann var að hita upp fyrir  CIMB Asia Pacific Classic mótið í  Malasíu – vingjarnlegan, hrekkjalóms apa.

Skyldi það vera frændi þessa, sem hræddi líftóruna úr Allenby?

Allenby var að æfa á 10. braut fyrir þetta sameiginlega mót PGA og Asíumótaraðarinnar sem byrjar á morgun þegar hann sá gráa veru hangandi í nálægu tré.

Hinn 40 ára Allenby sagðist hafa tekið mynd af apanum, en þegar hann fór nær til að taka aðra mynd hefði apinn gerst of vingjarnlegur.

„Ég var eltur af apa í gær, sem var áhugavert,“ sagði Allenby á blaðamannafundi á The Mines Resort & Golf Club í Kuala Lumpur.

„Þetta var bara lítill náungi en hann var með stórar tennur.“

„Hann hræddi líftóruna úr mér þannig að ég hljóp 160km/klst.“