Ákvarðanir R&A um reglu 6-3 a – Undantekningar frá frávísun komi kylfingur of seint á teig (1. grein af 5)

Nú á fimmtudaginn s.l. 21. mars 2013 fór fram fræðslu- og umræðufundur dómaranefndar GSÍ um hvað gera megi til að bæta leikhraða.

Þórður Ingason, alþjóðadómari ræddi á fundinum um „5 mínútna regluna“ svokölluðu, þ.e. reglu 6-3a í golfreglum R&A.  Reglan gengur út á að ef kylfingur mætir allt að 5 mínútum of seint á teig eigi hann ávallt rétt á að hefja leik gegn viðurlögum upp á 2 högg í víti.  Mæti hann seinna sætir hann frávísun.   Mæti kylfingur meira en 5 mínútum of seint hlýtur hann frávísunarvíti. Mínúturnar 5 skv. reglu 6-3 a eru því undantekningin frá því að kylfingur hljóti frávísun.

Á reglu 6-3 a er undantekning.  Þ.e. mótsnefnd (hér nefnd Nefndin) getur ákveðið að ekki skuli koma til þessara 2 högga í víti  mæti kylfingur allt að 5 mínútum of seint, eigi sérstök undantekningartilvik við um kylfing, sem hafi orðið þess valdandi að hann mætti of seint á teig.  Þessi undantekningtilvik eru túlkuð mjög þröngt.

Meðal efnis í ræðu Þórðar voru 5 nýlegar ákvarðanir R&A um túlkun á 5 mínútna reglunni.

Nú næstu daga verður fjallað um ákvarðanirnar 5 frá R&A, sem Þórður fór í , en þær eru allar nýlegar frá s.l. ári, 2012.

Ákvarðanirnar eru settar fram í spurnarformi og síðan reglan gefin í svari við spurningunni.

Spurning: Skv. undantekningu á reglu 6-3a segir að ef Nefndin ákveði að sérstakar undantekningarástæður hafi meinað kylfingi að hefja leik á réttum rástíma hans, þá verði engum viðurlögum beitt (2 högg í víti). Hverjar af eftirfandi ástæðum teljið þið vera slíkar að ekkert víti verði gefið komi kylfingur of seint á teig:

1. Kylfingur villist á leið á golfvöllinn?

2. Mikil umferð varð til þess að ferð kylfings á völlinn tók lengri tíma en hann bjóst við?

3. Meiriháttar slys tafði kylfing á leið á völlinn og ferð hans þangað tók lengri tíma en við var búist?

4 .Bíll kylfings bilar á leiðinni á völlinn?

5. Kylfingur er á vettvangi slyss og veitti aðstoð á slysstað eða var krafinn um skýrslu sem vitni og myndi annars ekki hafa mætt of seint á teig?

Svar: 

Það er engin nákvæm regla í þessu efni. Þetta er því matskennt. Viðeigandi framkvæmd byggist á kringumstæðum í sérhverju tilfelli fyrir sig og er komin undir ákvörðun Nefndarinnar. Almennt, myndi aðeins nr. 5 af ofangreindum tilvikum koma til athugunar varðandi það hvort veita eigi undanþágu frá víti undir reglu 6-3a. Það er á ábyrgð kylfings að tryggja að hann hafi ávallt nægan tíma til þess að komast til keppni og hann verður að gera ráð fyrir mögulegum töfum á leið sinni út á golfvöll.