Q-school LET: Viðtalið við Tinnu

Á heimasíðu Evrópumótaraðar kvenna,  (ens.: Ladies European Tour, skammst.: LET) er skemmtilegt viðtal við Tinnu Jóhannsdóttur, GK, sem nú keppir á lokaúrtökumóti LET í La Manga, Cartagena, í Murcia, á Spáni. Tinna er þar ein af 101 keppanda, sem freistar þess næstu 4 daga að ná einu af 30 efstu sætunum til þess að hljóta fullan keppnisrétt á LET, eða að öðrum kosti verða ein af þeim sem hljóta takmarkaðan spilarétt á LET. Fyrsta daginn (í gær) gekk ekki svo vel en nú er að sjá hvað Tinna gerir í framhaldinu.

Í viðtalinu kemur m.a. fram að Tinna hafi æft af kappi í haust m.a. með þátttöku á Cactus Tour í Bandaríkjunum, hún stefni að því að fá kortið sitt á LET eða a.m.k. þátttökurétt í nokkrum mótum, síðan fer hún yfir ýmsa þætti í leik sínum, m.a. hvert lengsta drævið sé, hver sé veikasta og sterkasta hlið leiks hennar, hvert púttmeðaltalið sé og meðaltals högglengd dræva, hver sé uppáhaldsgolfvöllurinn, og hvað sé lægsta skor á hring. Jafnframt segist Tinna þrívegis hafa farið holu í höggi, hún tali 5 tungumál, sé með gráðu í Alþjóðafræðum frá San Francisco háskóla, fyrirmyndir hennar séu Annika Sörenstam, Pia Nilson og concept Piu um „Vision 54″. Loks kemur fram í viðtalinu við Tinnu að Björgvin Sigurbergsson, föðurbróðir hennar og leikmaður Áskorendamótaraðarinnar, sé  í liði hennar.

Það er alltaf gaman að sjá Íslendinga standa sig vel úti í hinum stóra heima og það gerir Tinna svo sannarlega í viðtalinu.

Sjá má viðtal LET við Tinnu með því að smella hér: VIÐTAL LET VIÐ TINNU JÓHANNSDÓTTUR