Q-school LET: Tinna hefir lokið 1. hring á lokaúrtökumóti LET – Spilaði á 76 höggum

Þetta var svo sannarlega engin óskabyrjun fyrir Tinnu á 1. hring hennar af 5 á lokaúrtökumóti fyrir Evrópumótaröð kvenna. Fjórir skollar á fyrri 9 hafa líklega verið svekkjandi….  Tinna fékk skolla á 4., 5., 7. og 8. braut Norður-vallar La Manga golfstaðarins, en af þessum 4 holum eru 2 par-3 og hinar tvær par-4.

Tinna og frænka hennar Jódís Bóasdóttir á Íslandsmótinu í höggleik, 24. júlí 2011 - Þar barðist Tinna eins og hetja og það er vonandi að hún geri það sama á La Manga! Mynd: Golf 1.

Á seinni 9 fékk Tinna 2 fugla, en því miður líka  skolla og skramba á 12. og 15. brautirnar, sem báðar eru par-5. Hún lauk leik á samtals +5 höggum yfir pari og er sem stendur í 85. sæti, en fjölmargar stúlkur eiga eftir að ljúka leik og getur sætisröð Tinnu því hnikast til.  Í efsta sæti eru indverska stúlkan Sharmila Nicollet og  hollenska stúlkan Chrisje de Vries, sem voru virkilega að spila vel í dag – báðar á -5 undir pari; Sharmila á Suður-vellinum, en Chrisje á Norður-vellinum, eins og Tinna.

Ljóst er að eftir 1. hring er Tinna ekki meðal 30 efstu – en það eru 30 efstu af þeim 101, sem keppa í mótinu sem hljóta þátttökurétt á Evrópumótaröð kvenna 2012  (ens.: Ladies European Tour, skammst.: LET). Aðeins 1 íslenskum kvenkylfingi hefir hingað til tekist á komast á LET, Ólöfu Maríu Jónsdóttur, GK.  …. en ekki er öll nótt úti en, eins og allir vita eru hlutirnir fljótt að breytast í golfi og allt getur snúist Tinnu í hag á einu augabragði. Það er vonandi – enn er ekkert tapað.

Golf 1 óskar Tinnu virkilega góðs gengis á morgun!

Til þess að sjá stöðuna eftir 1. hring á lokaúrtökumóti LET, smellið HÉR: Q-SCHOOL LET – FINAL STAGE