Pizzagerðarmaðurinn Popovic leiðir fyrir lokahring Australian PGA

Það er ástralski kylfingurinn Daníel Popovic, sem er einn í forystu fyrir lokahring Australian PGA.

Popovic hefir 2 högga forystu á þann sem næstur kemur, landa sinn Anthony Brown. Popovic er búinn að leika á samtals 13 undir pari, 203 höggum (64 70 69).

Það er ekki svo langt síðan að Popovic var að búa til pizzur hjá Pompeo’s í Doncaster East í Melbourne, Ástralíu.

„Ég hef búið til pizzur í 5 ár og ég vann sem umferðarlögga í nokkra mánuði til þess að ná saman peningunum til þess að komast á Q-school Evrópumótaraðarinnar 2010,“ sagði Popovic.

Mamma Popovic, Mila grét eftir að sonur hennar náði að spila á 64 á fyrsta hrignum og hún var of taugaóstyrk til þess að horfa á framhaldið í sjónvarpinu. Pabbi Popovic, Radi, var á spítala til þess að láta draga sér blóð til krabbameinsrannsókna og missti líka af 1. hring sonarins.  Hann er svo flughræddur að hann getur ekki horft á son sinn spila á Coolum golfvellinum, þar sem mótið fer fram.

Ástralskir fjölmiðlar hafa gert sér mat úr pizzastarfi Popovic m.a. var fyrirsögn ástralska blaðsins Herald Sun: „Pizza man Daniel Popovic dreams of big dough at Australian PGA“ (sem útleggst eitthvað á þessa leið á okkar ylhýra: Pizzamaðurinn Daníel Popovic dreymir um stóra deigið (þ.e. mikla peninga) á ástralska PGA).

Brown hins vegar er á 11 undir pari, 205 höggum (73 68 64), spilar sífellt betur og átti m.a. glæsihring upp á 64 fyrr í morgun.

Þriðja sætinu deila sigurvegari Australian Open í ár Peter Senior og Matthew Griffin, eru 3 höggum á eftir Popovic.

Til þess að sjá stöðuna eftir 3. dag Australian PGA SMELLIÐ HÉR: