PGA: Spieth komst ekki gegnum niðurskurð á Byron Nelson

Jordan Spieth, 23 ára, komst ekki í gegnum niðurskurð í heimaríki sínu Texas á Byron Nelson mótinu, þrátt fyrir nýjan pútter og nýja golfskó.

Kannski var það einmitt þeirra vegna sem hann náði ekki í gegn?

Pútterinn sem Spieth hefir hingað til verið með er sá sem hann hefir verið með frá því hann var 15 ára þ.e. Titleist Scotty Cameron 009 Prototype, en hann er nýlega búinn að skipta yfir í  Futura T5W Tour Only pútter.

Kylfingar skipta ógjarna um púttera – t.a.m. sagði Tiger í viðtali nú nýlega að það væru aðeins 2 kylfur sem börnin hans Sam og Charlie fengju ekki að snert en það eru báðir pútterarnir sem hann vann 14 risamót með!

Það að Spieth skiptir um pútter, sýnir e.t.v. ákveðna örvæntingu hjá honum, hann var ekki að pútta vel með gamla Scotty og nýi pútterinn er heldur ekki að gera sig!

Gamli pútter Jordan Spieth

Á Byron Nelson Championship lék nr. 6 á heimslistanum (Spieth) á samtals 3 yfir pari (68 75) og var 1 höggi frá því að komast í gegn, en niðurskurður miðaðist við samtals 2 yfir pari, eða betra.

Spieth þurfti svo sannarlega á því að halda að ná í gegnum niðurskurð, en hann hefir nú ekki komist í gegnum niðurskurð á 3  af síðustu 4 mótum sínum.

Og það sem er enn verra í 6 að síðustu 10 mótum hefir hann verið að spila yfir pari.

Nú þegar aðeins eru 4 vikur til Opna bandaríska þá mun Spieth einfaldlega ekki vera fær um að keppa við sleggjur eins og Dustin Johnson, ef hann heldur uppteknum hætti og pútterinn nýi fer ekki að hitna hjá honum!