PGA: Rory McIlroy kylfingur ársins – John Huh nýliði ársins

Talsmaður PGA Tour tilkynnti í dag að Rory McIlroy hefði verið valinn kylfingur ársins á PGA Tour.

Jafnframt var John Huh útnefndur nýliði ársins. Sjá má kynningu Golf 1 á John Huh með því að SMELLA HÉR: 

Rory, 23 ára, er sá yngsti til þess að hljóta titilinn kylfingur ársins frá því að Tiger hlaut titilinn 1998. Hann hlýtur fyrir það hin svonefndu Jack Nicklaus verlaun. Rory vann 4 sinnum á PGA Tour í ár  þ.e. á  The Honda Classic, PGA Championship, Deutsche Bank Championship og BMW Championship.

Það voru félagarnir á Túrnum sem kusu þá Rory og Huh.

Tim Finchem, framkvæmdastjóri PGA Tour sagði m.a. af þessu tilefni: „Fyrir hönd PGA Tour vil ég þakka Rory og John fyrir frábæra frammistöðu þeirra þetta keppnistímabil.“

McIlroy var valinn kylfingur ársins umfram þá Jason Dufner, Brandt Snedeker, Bubba Watson og Tiger Woods, sem einnig höfðu verið tilnefndir.

John Huh

John Huh
Huh, 22 ára, var eini nýliðinn sem spilaði á TOUR Championship og þar með aðeins 5. nýliðinn til þess að ná svo langt frá því  FedExCup varð hluti af PGA Tour árið 2007.

Hann er líka sá yngsti til að spila á TOUR Championship frá árinu 2001, þegar Sergio Garcia spilaði í mótinu 21 árs.

Huh sigraði á fyrsta PGA móti sínu, Mayakoba Golf Classic í febrúar, þar sem hann lenti í eftirminnilegu 8 holu umspili við  Robert Allenby. Huh varð í 29. sæti á FedExCup og í 28. sæti á opinbera peningalistanum (hlaut $2,692,113) og var 4 sinnum meðal efstu 10 í mótum þ.á.m. T-2 á  Valero Texas Open.

Huh, sem fæddist í New York City og býr sem stendur fyrir utan Dallas er fyrsti kylfingurinn af kóresku bergi brotinn til þess að verða valinn nýliði ársins á PGA Tour.

Huh var tekinn fram fyrir  Charlie Beljan, Jonas Blixt, Bud Cauley og Ted Potter, Jr.