PGA: Phil Mickelson: „Fuglaveisla í vændum“ – myndskeið

Það er Phil Mickelson sem kom sér í forystu ásamt Fidji-eyingnum Vijay Singh með frábærum hring upp á 64 högg á BMW Championship.  Hann fékk 10 fugla og 2 skolla á frábærum hring sínum, sem kom honum í forystuna.

Phil segir m.a. í stuttu viðtali, sem tekið var við hann eftir hringinn og sjá má í myndskeiði hér fyrir neðan að dagurinn hafi verið skemmtilegur þar sem svo mörg pútt hafi dottið. Þetta er sjöundi hringurinn hans í röð með skor undir 70 og hann segir góðan árangur á 3. hring BMW Championship m.a. að þakka góðum aðstæðum, völlurinn hafi verið mjúkur og tekið vel við fuglapúttum.

Phil segist enn súr yfir því að árið 1991 þ.e. fyrir 21 ári hafi sér verið meinuð þátttaka í mótinu þar sem hann var áhugamaður, þrátt fyrir að hann hafi komist í gegnum úrtökumót og því með öll réttindi til þátttöku.

Phil sagði ennfremur í viðtalinu að mörg stór nöfn væru í baráttunni og það sem við mættum eiga von á í kvöld væri „fuglaveisla.“

Til þess að sjá myndskeið þar sem Phil talar um 3. hring sinn á BMW Championship SMELLIÐ HÉR: