PGA: Phil heldur forystu fyrir lokahring Phoenix Open – hápunktar og högg 3. dags

Phil Mickelson er búinn að halda forystunni alla 3 fyrstu dagana á Waste Management Phoenix Open 2013.

Í gær kom hann í hús með hring upp á 7 undir pari, 64 högg þar sem hann fékk 7 fugla og 11 pör; 2 fugla á fyrri 9 TPC Scottsdale vallarins og 5 á seinni 9 TPC Scottsdale vallarins.

Eftir hringinn sagði Phil m.a.: „Vonandi spila ég eins og ég hef gert fram að þessu í mótinu, það er númer eitt á morgun (þ.e. í dag – á lokahringnum).”

Samtals er Phil búinn að spila á 24 undir pari, 189 höggum (60 65 64) og hefir 6 högga forystu á Brandt Snedeker sem er í 2. sæti á samtals 18 undir pari, 195 höggum (64 66 65).

Það ætti víst fáum að koma á óvart að Phil sé að standa sig svona vel á TPC Scottsdale, því hann ólst jú upp í Scottsdale og spilaði m.a. með Sun Devils, golfliði Arizona háskóla í bandaríska háskólagolfinu og er því á heimavelli. Þess utan er Phil í miklu uppáhaldi hjá flestum áhorfendum Scottsdale, líkt og öðrum áhangendum golfíþróttarinnar í Bandaríkjunum; en kannski snefil meira heima hjá sér, enda oft nefndur „uppáhaldssonur Scottsdale!“ Phil er líka ósínkur að gefa af sér – nýtur þess að tala við áhorfendur og gefa eiginhandaáritanir.

Pádraig Harrington og Ryan Moore deila 3. sætinu á samtals 16 undir pari, 197 höggum hvor; Harrington (64 70 63) og Moore (66 66 65), en báðir eru þeir 8 höggum á eftir Mickelson.

Til þess að sjá stöðuna eftir 3. dag á Waste Management Phoenix Open SMELLIÐ HÉR:

Til þess að sjá hápunkta 3. dags á Waste Management Phoenix Open SMELLIÐ HÉR:

Til þess að sjá högg 3. dags á Waste Management Phoenix Open, sem er innáhögg Phil á 16. braut TPC Scottsdale  SMELLIÐ HÉR: