PGA: Luke Donald nr. 1 á CMN Hospitals Classic – Peningatitill PGA fer til Luke

Magnolia golfvöllurinn er hluti af „Magic Kingdom“ í Disney. Segja má að Luke Donald sé konungur í þessu „konungdæmi töfranna“ því það sem hann galdraði fram í dag á golfvellinum var ólýsanlegt.

Hann varð í 1. sæti í Children Miracle Network Hospitals Classic mótinu á samtals -17 undir pari, samtals 271 höggi (66 71 70 64).  Hann gerði það sem þurfti, spilaði á -8 undir pari og tryggði sér peningatitil PGA. Þar með er hann búinn að skrá sig á spjöld sögunnar fyrir að vera efstur á peningalistum beggja vegna Atlantsála þ.e. bæði á PGA og Evróputúrnum. Hann fékk 4 fugla og 2 skolla á fyrri 9 en síðan byrjuðu töfrarnir á seinni 9. Það virtist eins og hann gæti ekki fengið annað en fugla – þeir komu 6 í röð frá 10.-15. braut. Ótrúlega glæsilegt!

Samkeppni hans um efsta sæti peningalistans, Bandaríkjamaðurinn Webb Simpson lauk leik á samtals -13 undir pari, samtals 275 höggum (68 69 69 69) og varð T-6, ásamt 4 öðrum kylfingum þ.á.m. Trevor Immelman frá Suður-Afríku.

Í 2. sæti varð Bandaríkjamaðurinn Justin Leonard, 2 höggum á eftir Luke Donald á samtals -15 undir pari, 273 höggum  (69 63 70 71) og 3. sætinu deildur 3 kylfingar á -14 undir pari Tom Pernice (sem rétt hélt sér innan 125 marklínu peningalistans (121) og tryggði sér þar með kortið sitt á PGA á næsta ári); sömu sögu er að segja af Sunghoon Kang (120) en Kevin Chappall, sem var í forystu í gær dalaði aðeins kom í hús á 72 höggum, en er öruggur með kortið í 66. sæti peningalistans.

Til þess að sjá úrslit á Children Miracle Network Hospitals Classic smellið HÉR: