Ragnheiður Jónsdóttir | janúar. 22. 2018 | 03:30

PGA: Jon Rahm sigraði á CareerBuilder Challenge – Hápunktar 4. dags

Spænski kylfingurinn Jon Rahm sigraði á CareerBuilder Challenge, móti vikunnar á PGA Tour, eftir bráðabana við Andrew Landry.

Eftir hefðbundnar 72 holur voru þeir Rahm og Landry efstir og jafnir; báðir búnir að spila á 22 undir pari.

Það varð því að koma til bráðabana milli þeirra og þar hafði Rahm betur á 4. holu bráðabanans.

Þetta er 2. sigur Rahm á PGA Tour og 4. sigur hans á heimsvísu.

Rahm tók forystu þegar á fimmtudaginn þ.e. 1. mótsdegi með frábærum hring upp á 62 sem hann fylgdi síðan eftir með hringjum upp á 67 og 70. Lokahringinn spilaði Rahm á 67.

Með þessum sigri fer Rahm í 2. sæti heimslistans og veltir þar með Jordan Spieth úr því sæti.

Landry (63 65 70 68) hefir sigrað tvívegis á Web.com Tour en aldrei á PGA Tour og þetta hefði verið fyrsti sigur hans á PGA auk þess sem hann hefði tryggt kortið sitt út 2019-2020 keppnistímabilið og hlotið boð um að spila á Masters, Players, og PGA Championship. En 2. sætið er besti árangur hans á PGA Tour til þessa.

Þriðja sætinu deildu John Huh og Adam Hadwin og Martin Piller á 20 undir pari og jafnir í 6. sæti voru Kevin Chappell og Scott Piercy á samtals 19 undir pari, hvor.

Barnabarn Arnold Palmer, Sam Saunders átti besta skor lokahringsins 8 undir pari, 64 högg og lauk keppni á samtals 18 undir pari og T-8, sem er besti árangur hans á PGA Tour.

Austin Cook sem var í forystu fyrir lokahringinn fataðist flugið, lék lokahringinn á 3 yfir pari, 75 höggum og rann niður skortöfluna í 14. sætið.

Til þess að sjá lokastöðuna á CareerBuilder Challenge SMELLIÐ HÉR: 

Til þess að sjá hápunkta lokahringsins á CareerBuilder Challenge SMELLIÐ HÉR: