PGA: Day hafði betur í bráðabananum g. Norén

Það var fyrrum nr. 1 á heimslistanum, Jason Day, sem stóð uppi sem sigurvegari í Farmers Insurance Open í dag.

Í gær, sunndaginn 28. janúar 2018 þurfti að fresta bráðabananum milli Day og Alex Norén,  sem þá var kominn á 5. holu vegna myrkurs. Hafist var handa þar sem frá var horfið í bráðabananum í dag.

Day þurfti aðeins að spila í 13 mínútur – en 6. hola bráðabanans var ekki par-3 16. holan (eins og Golf 1 greindi ranglega frá í gær), heldur var par-5 18. hola Torrey Pines spiluð í 4. sinn í þessum bráðabana.

Þessi 6 holu bráðabani var sá lengsti í 67 ára sögu mótsins.

Á 6. holu bráðabanans þurfti Day aðeins 4 högg til þess að hafa betur gegn Alex Norén – hann fékk fugl meðan Norén var með skolla.

Þetta var 11. sigur Day á PGA. Eftir sigurinn sagði Day m.a.: „Þessi (sigur) hefir verið langan tíma á leiðinni,“ og vísaði þar með til slaks árs síns 2017, þar sem miklar áhyggjur af móður hans, sem var að ná sér eftir lungakrabbamein, urðu til þess að Day missti einbeitni og aga í spili sínu. Nú er allt á uppleið aftur og sigur Day vonandi sá fyrsti af nokkrum á þessu ári 2018!

Sjá má lokastöðuna á Farmers Insurance Open með því að SMELLA HÉR: