PGA: Brian Harman sigraði á John Deere Classic – Hápunktar 4. dags

Það var Brian Harman sem fagnaði sigri á John Deere Classic mótinu í gærkvöldi.

Zach Johnson, sem leiddi mestallt mótið og Harman eru nágrannar á St. Simons Island í Georgia og Johnson sagði m.a. eftirfarandi um nágranna sinn eftir að ljóst var að sigurinn væri Harman:

„Hann (Harman) hefir alltaf verið þekktur sem hugrakkur kylfingur, sem spilar býsna einfalt golf.“

„Hann er ákafur.  Það er ekki mikil hræðsla í honum. Hann er e.t.v. lítill að líkamsvexti, en það er ekkert lítið varðandi golfið hans.“

Harman er 1,70 m hár og 70 kg en hann sigraði í gær með samtals skor upp á 22 undir pari, 262 höggum (63 68 65 66) og Zach Johnson, nágranni hans umsagnarglaði varð í 2. sæti 1 höggi á eftir á samtals 21 undir pari, 263 höggum (63 67 69 64).

Brian Harman er 27 ára.  Hann gerðist atvinnumaður í golfi 2009 og sigurinn á John Deere Classic er fyrsti sigur hans á PGA Tour; sigur sem er kærkominn því auk verðlaunafésins fær Harman keppnisrétt næstu 2 ár á PGA Tour.

Þriðja sætinu deildu Jhonattan Vegas og Jerry Kelly á samtals 19 undir pari og Tim Clark og Scott Brown deildu 5. sætinu á samtals 18 undir pari.

Sá sem átti titil að verja í mótinu, Jordan Spieth deildi síðan 7. sætinu með Bo Van Pelt, Ryan Moore og Johnson Wagner en allir voru þeir á samtals 16 undir par, 6 höggum á eftir sigurvegaranum.

Til þess að sjá lokastöðuna á John Deere Classic SMELLIÐ HÉR:

Til þess að sjá hápunkta 4. dags á John Deere Classic SMELLIÐ HÉR: