Ragnheiður Jónsdóttir | mars. 10. 2013 | 11:30

PGA: Bolti Tiger lenti í pálmatré á 17. braut á 3. hring Cadillac-mótsins

Þetta er nokkuð sem eflaust einhverjir íslenskir kylfingar hafa reynt þegar þeir spila á suðlægari slóðum: að slá bolta sinn í pálmatré.

Það kom fyrir Tiger Woods á par-4 17. dogleg/hundslappar braut Bláa Skrímslisins á 3. degi WGC-Cadillac Championship.  Hann húkkaði bolta sínum beint í pálmatré.  Og hvað gera 14-faldir risamótsmeistarar þá?

Náð var í dómara, sem bað Tiger um upplýsingar um merkingu á boltanum hans og staðfesti stuttu síðar eftir að hafa skoðað boltann í gegnum sjónauka að þetta væri bolti Tiger, þarna uppi í pálmatrénu.

Tiger varð að taka víti, en náði engu að síður skolla á holuna, sem hann tók aftur stuttu síðar á erfiðu par-4 18. einkennisbraut Bláa Skrímlisins með fugli!

Svona gera bara snillingar!!!

Sigri Tiger verður þetta ekki aðeins 7. sigur hans á WGC-Cadillac Championship heldur líka 76. sigur hans á PGA Tour.

Hér í lokin smá tölfræði: Tiger leiðir í mótinu með 4 högg og hann hefir aldrei á ferli sínum tapað móti, þar sem hann hefir leitt með fleira en 3 höggum fyrir lokahring!!!