PGA: Billy Horschel er sigurvegari á Zurich Classic með lokahring upp á 64 högg!

Það var bandaríski kylfingurinn Billy Horschel sem vann sinn fyrsta sigur á PGA mótaröðinni nú í kvöld þegar hann innsiglaði sigur sinn með glæsilokahring upp á 64 högg á Zurich Classic.

Samtals lék Horschel á 20 undir pari, 268 höggum (67 71 66 64).  Á lokahringnum lék hann sem segir á 8 undir pari, fékk 9 fugla, 8 pör og 1 skolla.

Billy Horschel er 26 ára Flórídabúi og sjá má kynningu Golf 1 á honum með því að SMELLA HÉR: 

Aðeins 1 höggi á eftir Horschel í 2. sæti varð DA Points á samtals 19 undir pari, 269 höggum (66 68 70 65).

Í 3. sæti varð Kyle Stanley á samtals 17 undir pari, 271 höggum (72 67 65 67).

Forystumaður gærdagsins, Lucas Glover deildi 4. sætinu með Bandaríkjamanninum Bobby Gates á 15 undir pari.

Boo Weekly og Harris English urðu í 6. sæti á samtals 14 undir pari, hvor og efstur Evrópumanna í mótinu varð Belginn Nicolas Colsaerts, sem spilaði á samtals 13 undir pari og deildi 8. sæti með 7 öðrum.

Í 15. sæti voru 6 kylfingar á 12 undir pari, þ.á.m. stórkanónurnar Justin Rose, Ernie Els og Bubba Watson.

Kínverski strákurinn Guan Tianlang, sem komst í gegnum niðurskurð rak lestina í mótinu af þeim sem náðu niðurskurði, hafnaði í 71. sæti, en þar var aðallega um að kenna „slæmum 3. hring“, en Guan var búinn að jafna sig í dag að nokkru og spilaði á 74 höggum! Hans bíður eflaust glæsiframtíð í golfheiminum!!!

Til þess að sjá úrslitin á Zurich Classic SMELLIÐ HÉR: