Ragnheiður Jónsdóttir | janúar. 21. 2021 | 10:00

Orð Justin Thomas eftir að Ralph Lauren rifti styrktarsamningi við hann

Justin Thomas sagðist vera í uppnámi vegna ákvörðunar Ralph Lauren um að binda enda á áralangan styrktarsamning við hann, en sagðist munu halda áfram líkt og þeir hefðu gert.

Það, hvert vægi orð hafa, kom berlega í ljós á 4. holu á 3. hring Sentry TOC, þar sem Thomas sagði aðeins eitt orð, „faggot“ (hommi) sem hafði þessar afleiðingar, þ.e. samningsslitin.

Þarna var hann að blóta sjálfum sér fyrir að hafa ekki náð par-pútti.  Hann notaði orðið hommi, sem skammaryrði um sjálfan sig.

En, eru hommar eitthvað verri kylfingar? Það hefir aldrei verið sannað og líklega eru þeir það alls ekki nema síður sé. Orðið hommi lýsir aðeins kynhneigð viðkomandi aðila.  Þannig að ef gagnkynhneigður aðili, líkt og Thomas, notar það um sjálfan sig þá er hann í raun e.t.v. aðeins að lýsa yfir þetta sé hann ekki.   Hugsunin, ef einhver, í andartaksreiðikasti, var bara að segja að „þetta væri ekki hann!“ og yfirfært … þ.e. slæmur púttari. Örugglega engin sneið til homma í þessu.

Það að hann lét af vörum falla þetta eina orð er eitthvað svo vanhugsað og vitlaust; eitthvað sem óþroskað fólk notar, sem skammaryrði.   Enda sagði hann það síðan í afsökunarbeiðni sinni að hann væri fullorðinn (27 ára) og ætti að vita betur að viðhafa svona orð (í þessu sambandi).

Það, sem hann sagði, varð lýðnum ljóst vegna þess hversu næmir hljóðnemar eru orðnir. Makalaust eiginlega, að menn geti ekki tautað eitthvað fyrir munni sér, án þess að alheimur fái að vita af því…. með þessum líka drakónísku afleiðingum.

Aðspurður hvað honum hafi fundist um ákvörðun Ralph Lauren, að rifta samningum við sig, sagði Thomas:

Ég held að vonbrigði sé rangt orð. (Innskot: Thomas á greinilega í einhverjum vandræðum að rata á réttu orðin!! 🙂 )  Augljóslega var ég í uppnámi en í lok dags hafa þeir þennan rétt. Þeir urðu að taka þá ákvörðun, sem þeir þurftu að taka.“

Ég talaði við þá ásamt öllum styrktaraðilum mínum og þó að ég hafi beðist afsökunar … þá var þetta tækifæri fyrir mig að vaxa og mér fannst þetta vera eitthvað sem við hefðum getað gert saman og gengið í gegnum það ferli.“

En þeim fannst eins og þeir þyrftu að halda áfram sinn veg, svo það er nákvæmlega það sem ég er að gera líka.“

Þetta var frábær tími og frábært samstarf sem við áttum og [vonandi] fara hlutirnir á besta veg.“ 

Aðpurður hvað hann hefði vonast til að Ralph Lauren hefði gert í stað þess að segja upp samningum við hann sagði Thomas: „Rétt eins og aðrir styrktaraðilar mínar, þá var þetta tækifæri fyrir þá að hjálpa mér, rétt eins og ég vonast til að hjálpa þeim. Ég er klárlega ekki stoltur af því sem ég sagði. Það var niðurlægjandi, það var vandræðalegt, þetta var ekki ég. Þetta er ekki orð sem ég nota, en af einhverjum ástæðum var það þarna inni. Það er það sem ég er að reyna að átta mig á, af hverju það var þarna inni. Eins og ég sagði, þetta verður hluti af þessu ferli og þjálfunaráætlun, eða hvað sem ég þarf að gera – ekki aðeins til að sanna fyrir sjálfum mér heldur til að sanna fyrir styrktaraðilum mínum og sanna fyrir því fólki sem veit ekki hver ég er, að þetta varr sannarlega ekki sá sem ég er.

Justin Thomas virðist svo sannarlega einlæglega miður sín og hefir beðist afsökunar, sem er miklu meira en margur myndi gera. Og það áður en nokkur sagði upp samningum við hann. Þannig að mörgum finnst svo komið að verið sé að gera úlfalda úr mýflugu …. eða er þetta orðið eitthvað niðrandi í garð úlfalda eða kannski mýflugna …..