Opna bandaríska 2017: Adam Scott telur að það sé hægt að týna kaddýnum í þykka röffinu á Erin Hills

Öfugt við þá sem kvarta og kveina yfir þykka röffinu í Erin Hills, þar sem 117. Opna bandaríska fer fram nú í vikunni, þá sér ástralski kylfingurinn Adam Scott spaugilegu hliðina á þessu.

Hann sagði m.a. brosandi á blaðamannafundi að röffið væri svo þykkt í Erin Hills, að það væri auðveldlega hægt að týna kaddýnum sínum þar.

Erin Hills er þar að auki svo gríðarlega stór völlur um 7000 metra og landsvæðið þar um kring, að auðveldlega gætu rúmast 3 golfvellir þar.

Landið er hins vegar allt fremur bert og opið þannig að vindar gætu gert mörgum kylfingnum skráveifu í mótinu.

Völlurinn er um 40 mínútna akstursleið frá Milwaukee í Wisconsin og í algjöru landbúnaðarhéraði.

Scott kom til Erin Hills á mánudaginn og hefir verið við æfingar þar síðan eftir að hafa orðið T-10 á FedEx St. Jude Classic í Memphis, Tennessee.