Öldungamótaröð Evrópu: Peter Mitchell fékk Porsche Panamera fyrir að fara holu í höggi!!!

Englendingurinn Peter Mitchell tók þátt í Pon Senior Open á golfvelli WINSTON.golf í Vorbeck í Schwerin í Þýskalandi. Mótið er hluti af Öldungamótaröð Evrópu. Mitchell sem er 54 ára náði draumahögginu á 7. braut …. og hlaut í verðlaun glænýjan Porsche Panamera… svipuðum þeim sem Gylfi Þór Sigurðsson ekur um á, nema hvítur!!!

Peter Mitchell á teig holunnar góðu

Par-3, 7. holan er 140 metra löng og við höggið góða notaði Mitchell 9-járn. Hann sagðist ekki hafa trúað því að boltinn hefði farið ofan í holu. „Ég sló bara eins og venjulega og hafði ekki hugmynd um hvernig til tókst.“

Porsche Panamera er um € 100.000,- virði (þ.e. 16,5 milljóna íslenskra króna) og kemst úr 0 í 100 km/klst á 6.8 sekúndum, og nær allt að 261 km/klst hraða.

Það ætti ekki að vera leiðinlegt fyrir Mitchell að keyra heim til Englands á Autoböhnum Þýskalands þar sem engar hraðatakmarkanir eru…..