Fylgist með Ólafi Lofts á West Orange CC í Flórída í dag

Ólafur Björn Loftsson, NK, mun á næstunni taka þátt í úrtökumóti fyrir PGA Tour Latino América, þ.e. suður-amerísku mótaröðinni.

Í dag hefur hann hins vegar leik í móti á NGA mótaröðinni í Orlando, nánar tiltekið í West Orange CC, til þess að komast í spilaform og vera vel undirbúinn fyrir þá suður-amerísku, en 5 efstu af þeirri mótaröð hljóta þátttökurétt á Web.com mótaröðinni, sem er sem stendur eini aðgangurinn að bestu mótaröð heims, PGA Tour.

Fylgjast má með gengi Ólafs Björns í West Orange CC með því að SMELLA HÉR: 

Ólafur Björn segir eftirfarandi um ofangreint á facebook síðu sinni:

„Kominn til Orlando, tilbúinn til að hefja nýtt keppnistímabil. Ég hef lagt afar hart að mér að undanförnu og hlakka til að takast á við næstu verkefni. 

Ég hef ákveðið að taka þátt í úrtökumóti fyrir PGA Tour Latinoamérica sem er Suður-Ameríska mótaröðin í golfi. Mótið fer fram 21.-24. janúar í Flórída og taka 132 kylfingar þátt á þessum stað. 20 efstu vinna sér inn þátttökurétt á mótaröðinni sem hefst í Kólumbíu í febrúar.

Efstu fimm leikmennirnir á peningalista PGA Tour Latinoamérica í árslok öðlast þátttökurétt á Web.com mótaröðinni í Bandaríkjunum sem er næsta mótaröð fyrir neðan PGA mótaröðina.

Ég stefni að því að spila mikið á næstu dögum og komast í gott leikform. Ég er til að mynda skráður til leiks í þriggja daga móti á NGA mótaröðinni sem hefst á þriðjudaginn í Orlando. 

Ég vil nýta tækifærið og þakka öllum mínum stuðnings- og styrktaraðilum fyrir frábæran stuðning á síðasta ári. Ég fer inn í nýtt tímabil fullur sjálfstrausts og tilhlökkunar.“