Ólafur Björn náði ekki niðurskurði

Ólafur Björn Loftsson, NK, náði ekki niðurskurði á Willow Creek Open, sem er hluti af eGolf-mótaröðinni.

Spilað var í High Point Country Club í Willow Creek, Norður-Karólínu.  Þátttakendur eru 149.

Ólafur Björn lék hringi sína tvo á samtals 2 yfir pari, 146 höggum (76 70). Hann spilaði seinni hring sinn vel, var á 2 undir pari, fékk 5 fugla, 10 pör og 3 skolla en það dugði ekki til því niðurskurður var miðaður við 2 undir pari og Ólafur Björn því 4 höggum frá því að komast í gegn.

Ólafur Björn skrifaði eftirfarandi um Willow Creek Open mótið á facebook síðu sína:

„Spilaði á 70 höggum (-2) í gær á öðrum hring á móti á eGolf mótaröðinni. Ég náði ekki að sýna mitt rétta andlit á fyrsta hring sem ég lék á 76 höggum (+4) og komst því miður ekki í gegnum niðurskurðinn í þetta skiptið. Aðstæður voru heldur erfiðari eftir hádegi á fyrsta hring og náði ég aldrei að komast á flug. Ég vissi að ég þyrfti góðan hring á öðrum degi og eftir góðar æfingar milli hringja gaf ég mér ágætan möguleika. Ég var á 3 undir pari eftir 10 holur og var hársbreidd frá því að bæta við fleiri fuglum en ég spilaði mjög grimmt á lokaholunum. Þrátt fyrir að ég sé ekki að púsla saman nógu góðu skori er margt gott í gangi og bara tímaspurgsmál hvenær þetta smellur allt saman. Það er annars mikið að gera þessa dagana. Ég held til Washington um helgina en það er úrtökumót fyrir mót á Web.com mótaröðinni á þriðjudag. Þess á milli að sjálfsögðu stífar æfingar.“

Sjá má stöðuna eftir niðurskurð á Willow Creek Open með því að  SMELLA HÉR: