Ragnheiður Jónsdóttir | desember. 12. 2017 | 10:00

Nýju stúlkurnar á LPGA 2018: Maude Aimee Leblanc (6/49)

Það voru 49 stúlkur sem hlutu spilarétt á LPGA mótaröðina 2018 í gegnum lokaúrtökumót LPGA sem fram fór á LPGA International vellinum í Flórída dagana 28. nóvember – 3. desember s.l.

Það voru 29 sem hlutu takmarkaðan spilarétt og 20 efstu stúlkurnar sem hlutu kortið sitt á LPGA þ.e. fullan þátttökurétt í öllum mótum LPGA 2018.

Venja hefir verið undanfarin ár að kynna „nýju“ stúlkurnar á LPGA og líkt og áður verður byrjað að kynna þær sem rétt sluppu inn á mótaröðina og hlutu takmarkaðan spilarétt endað á þeirri sem sigraði í lokaúrtökumótinu, en það var japanska stúlkan Nasa Hataoka.

Nú verða kynntar þær 13 stúlkur, sem deildu 32. sætinu og hlutu takmarkaðan spilarétt  og verður byrjað á kanadísku stúlkunni Maude Aimee Leblanc.

Maude Aimee LeBlanc fæddist  14. febrúar 1989 og er því 28 ára. Hún er dóttir hjónanna  Merlyne Laflamme og Gaston LeBlanc og á 2 bræður Gaston LeBlanc, Jr. og Yannick Laflamme og eina systur Leilu.

Maude Aimee byrjaði að spila golf 5 ára. Hún er fremur hávaxinn kvenkylfingur eða 1,85 m á hæð.

Hún segir pabba sinn hafa verið þann aðila sem hafði mest áhrif á golfferil sinn.

Meðal áhugamála utan golfsins er að spila tennis, horfa á kvikmyndir, verja tíma með fjölskyldu og vinum og fara í vínsmakkanir.

Hún segir það að hafa leikið sér með ljónsunga í Suður-Afríku meðal þess svalasta sem hún hafi gert í lífi sínu.

Maude Aimee spilaði í bandaríska háskólagolfinu með liði Purdue á árunum 2007-2010 og má sjá afrek hennar þar með því að SMELLA HÉR: 

Í Purdue lagði hún stund á sálfræði en útskrifaðist ekki því hún komst á LPGA í fyrstu tilraun, árið 2011 eftir að hún gerðist atvinnumaður í golfi það ár.

Nokkrar fréttir hafa verið um það hversu skapmikil Maude-Aimee er og hefir henni m.a. verið vikið úr golfmótum vegna óíþróttamannslegrar framkomu – Sjá m.a. grein um það með því að SMELLA HÉR: 

Frá 2012 hefir Maude Aimee ýmist verið með fullan eða takmarkaðan spilarétt á LPGA eða spilað á Symetra Tour þ.e. 2. deild kvennagolfsins í Bandaríkjunum.