Celine Herbin
Ragnheiður Jónsdóttir | janúar. 24. 2018 | 10:00

Nýju stúlkurnar á LPGA 2018: Celine Herbin (32/49)

Það voru 49 stúlkur sem hlutu spilarétt á LPGA mótaröðina 2018 í gegnum lokaúrtökumót LPGA sem fram fór á LPGA International vellinum í Flórída dagana 28. nóvember – 3. desember s.l.

Það voru 29 sem hlutu takmarkaðan spilarétt og 20 efstu stúlkurnar sem hlutu kortið sitt á LPGA þ.e. fullan þátttökurétt í öllum mótum LPGA 2018.

Venja hefir verið undanfarin ár að kynna „nýju“ stúlkurnar á LPGA og líkt og áður verður byrjað að kynna þær sem rétt sluppu inn á mótaröðina og hlutu takmarkaðan spilarétt endað á þeirri sem sigraði í lokaúrtökumótinu, en það var japanska stúlkan Nasa Hataoka.

Nú verður tekið til við að kynna þær 20 stúlkur sem hlutu fullan spilarétt og kortið sitt á LPGA. Í fyrradag var byrjað á Maríu Torres, sem varð svo sannarlega að berjast fyrir veru sinni á LPGA og hafði betur í bráðabana gegn tveimur öðrum og var ein í 20. sæti.

Í gær var hafist handa við að kynna þær 4 sem deildu 16. sætinu, en það eru Brianna Do, Celine Herbin, Dani Holmqvist og Jessi Tang. Byrjað var á að kynna Briönnu Do og í dag verður Celine Herbin kynnt.

Celine Herbin er dóttir Michel og Claudine Herbin . Hún fæddist 30. október 1982 í Avranches, Frakklandi, og er því 35 ára.

Herbin byrjaði að spila golf 15 og 1/2 árs sem er fremur seint af atvinnukylfingi að vera í dag.

Herbin segir að þeir sem mest áhrif hafi haft á feril hennar sé þjálfari hennar, en þjálfun hennar var slík að hún komst inn á bestu kvenmótaröð heims í 1. tilraun. Nýliðaár hennar á LPGA var 2015.

Herbin var 1 ár við nám í Bucknell University sem skiptinemi og spilaði það ár með háskólaliðinu í bandaríska háskólagolfinu.

Árið 2004 sigraði hún sem áhugamaður á Georgetown Invitational. Árið 2012 gerðist Herbin atvinnumaður.

Á árunum 2012-2014 var Herbin á Evrópumótaröð kvenna, sem hún spilar reyndar enn á, en hún vann sér fyrst inn takmarkaðan spilarétt á LPGA í Q-school 2014 og lék því í nokkrum LPGA mótum 2015.

Besti árangur Herbin 2015 var þó á heimavelli á LET móti þ.e. á Lacoste Open sem hún sigraði í, en sjá má frétt Golf 1 þess efnis með því að SMELLA HÉR: