Nýju stúlkurnar á LPGA 2017: Angel Yin (52/54)

Þann 30. nóvember – 4. desember 2016 fór fram 3. stigs mót LPGA, lokaúrtökumót um hverjar 20 myndu hljóta fullan keppnisrétt á LPGA keppnistímabilið 2016-2017 og hvaða keppendur hlytu takmarkaðan keppnisrétt þ.e. þær sem voru í sætum 21-45 og þær sem jafnar voru í 45. sætinu eða T-45.

155 þátttakendur voru að þessu sinni.

Næst verða þær kynntar sem deildu 3. sætinu og hlutu kortið sitt og báðar FULLAN keppnisrétt á LPGA.

Þetta eru þær Angel Yin og Sadena Parks báðar frá Bandaríkjunum.

Þær spiluðu báðar á 11 undir pari, 349 höggum: Angel Yin (74 67 69 68 71 ) og Sadena Parks (69 72 67 68 73).

Búið er að kynna Sadenu Parks og í dag verður Angel Yin kynnt lítillega.

Angel Yin fæddist í borg englanna í Monterey Park, Los Angeles, 3. október 1998 og er því aðeins 18 ára.

Hún er ótrúleg sleggja og því varð hún þrátt fyrir ungan aldur í 3. sæti lokaúrtökumóts LPGA.

Yin gerðist atvinnumaður í golfi 1. janúar 2016, þá aðeins 17 ára.

Yin segir uppáhaldskylfinga sína vera: Tiger Woods & Anniku Sörenstam.

Uppáhaldsiðja Yin utan golfsins er að lesa, ferðast, lenda í ævintýrum og borða og sofa.

Yin er vinkona Ólafíu Þórunnar „okkar“ Kristinsdóttur.

Á fyrsta mótinu á LPGA í Bahamas varð hún T-60 og komst gegnum niðurskurð sem er frábær árangur hjá svona ungri stúlku eins og Yin, sem er að stíga sín fyrstu skref á LPGA.