Nýju stúlkurnar á LPGA 2015: Emma de Groot (8/45)

Það voru 8 stúlkur sem deildu 35.-42. sætinu á lokaúrtökumóti LPGA, sem fram fór 3.-7. desember 2014.

Lokaúrtökumótið fór fram á Hill og Jones golfvöllunum á  LPGA International, á Daytona Beach, í Flórída.

Ein þessara 8 var ástralska stúlkan Emma de Groot.

Emma de Groot  fæddist í Southport, Queensland í Ástralíu, 15. júlí 1988 og er því 26 ára.  Hún byrjaði að spila golf 13 ára og segir foreldra sína þá aðila sem hafi haft mest áhrif á feril sinn.  Þau hafi ætíð hvatt hana í golfinu en aldrei verið með neinar kröfur á hana.

Hún spilaði í bandaríska háskólagolfinu með golfliði University of Tennessee í 4 ár, þ.e. til 22 ára aldurs og gerðist eftir útskrift í íþróttafræðum (ens.: Sports Management) atvinnumaður í golfi, árið 2011.  De Groot vann 6 sinnum í einstaklingskeppni í bandaríska háskólagolfinu.

Árið 2011 var De Groot í ástralska landsliðinu í Astor Trophy.

Eftir það lék hún m.a. á ALPG (þar sem hún hefir sigrað) og hefir verið á Symetra Tour  (2. deild LPGA) frá árinu 2012,  en árið 2014 spilaði hún í 2 mótum á Symetra.

Áhugamál Emmu de Groot eru næstum allar íþróttir og að fara í bíó vegna poppkornsins þar.

Meðal hjátrúar hjá henni er að ef hún spilar vel einn daginn þá borðar hún það sama og reynir að gera allt það sama annan dag og alveg öfugt ef illa gengur þá breytir hún öllu.

Uppáhaldsleikmaður Emmu er ástralska golfdrottningin Karrie Webb.

Hér má sjá nýlegt viðtal fréttamanns LPGA við Emmu de Groot SMELLIÐ HÉR

En nú keppnistímabilið 2015 er De Groot komin með takmarkaðan spilarétt á LPGA, bestu kvenmótaröð heims.