Nýju stúlkurnar á LPGA 2012 (10. grein af 20) – Tanya Dergal, Hannah Yun og Elisa Serramia

Fimm stúlkur urðu jafnar í 15. sæti á lokaúrtökumóti Q-school LPGA, sem fram fór 30. nóvember – 4. desember á Champions og Legends golfvöllunum í Daytona Beach, Flórída:  Victoria Tanco, sem þá var áhugamaður, frá Bradenton, Flórída; Ayaka Kaneko frá Honolulu á Hawaii; Tanya Dergal frá Mexíkó; Hannah Yun frá Bradenton í Flórída og Elisa Serramia frá Barcelona á Spáni. Allar spiluðu þær á samtals +4 yfir pari og voru 19 stúlkur á því skori eða betra.  Aðeins 20 efstu hlutu fullan þátttökurétt á LPGA og varð að fara fram 9 stúlku umspil um 20. sætið, en 9 voru á samtals +5 yfir pari. Það var Lizette Salas sem vann umspilið, en hún var kynnt í gær ásamt 3 öðrum sem urðu í 20. sæti.

Í kvöld verður byrjað á að kynna 3 af þeim 5 sem urðu jafnar í 15. sæti: Tönyu Dergal, Hönnuh Yun og Elísu Serramia, en allar hlutu þær sem fyrr segir fullan spilarétt á LPGA, keppnistímabilið 2012.

Byrjum á Elísu Serramia:

Elisa Serramia.

Elisa fæddist 7. september 1984 í Barcelona á Spáni og er því 27 ára. Hún hefir spilað golf frá 7 ára aldri. Hún sigraði  British Ladies Amateur Golf Championship, árið 2003. Elísa varð í 2. sæti á 2004 European Amateur Championship. 2004 en sigraði  International Tournament of France. 2004. Þetta ár, 2004, gerðist Elísa atvinnumaður í golfi. Fyrst spilaði hún á Evrópumótaröð kvenna (LET) og var m.a. valin nýliði ársins 2005. Frá ársbyrjun 2009 spilaði Elísa í Bandaríkjunum á Futures Tour og síðan komst hún í fyrstu tilraun sinni á LPGA. Það hefir ekkert gengið allt of vel hjá nýliðanum Serramía því hún hefir t.a.m ekki náð niðurskurði í s.l. 2 mótum: Kia Classic og RR Donnelley LPGA Founders Cup.

Elisa er með sína eigin heimasíðu sem sjá má HÉR: 

Næst er það Hannah Yun:

Hannah Yun fæddist 13. apríl 1992 og er því 19 ára. Hún byrjaði að spila golf 4 ára. Hún segir pabba sinn vera þann einstakling sem hafi haft mest áhrif á feril sinn. Hún á eina eldri systur, Catherine. Meðal áhugamála Hönnuh eru evrópskir sportbílar. Hannah komst á LPGA Tour í fyrstu tilraun sinni og er þegar búin að landa stórum styrktarsamningi… við TaylorMade.

Sem áhugamaður spilaði Hannah með golfliði University of Florida, þar sem hún var SEC All-Conference First Team selection árið 2008 og  NGCA All-American Honorable Mention selection 2008, og auk þess Golfweek First Team selection. Svo vann hún tvívegis á Suncoast Series Tour árið 2008.

• Í apríl 2009 varð Hannah atvinnumaður í gofi.  Hún spilaði á Symetra Tour á árunum 2008-2011 þar sem besti árangur hennar var T-4 í Falls Auto Group Classic, 2009.
• Svo er það Tanya Dergal.

Tanya Dergal.

Tanya Dergal er frá Mexíkó og fæddist 6. apríl 1984. Tanya er því 27 ára (og á þar að auki sama afmælisdag og Robert Rock!) Hún byrjaði að spila golf 8 ára og segir foreldra sína og bróður vera þá einstaklinga, sem hafi haft mest áhrif á feril sinn í golfinu. Meðal áhugamála Tanyu eru dans og verja tíma með fjölskyldu sinni. Hún komst á LPGa í 2. tilraun.

Dergal spilaði með golfliði University of Southern California og var  hluti NCAA Women’s Golf Championship liðsins árið 2003. Hún var með í 4 Women’s World Amateur Championships f.h. Mexíkó: (2000, 2002, 2004, 2006).  Í janúar 2007 gerðist Tanya atvinnumaður.

Árið 2009 varð hún í 28. sæti á lokaúrtökumóti LPGA og hlaut takmarkaðan spilarétt  (Priority List Category 16 á 2010 LPGA keppnistímabilinu. Í þetta skipti var Dergal í 15. sæti og fær fullan þátttökurétt í öllum mótum LPGA.