Ragnheiður Jónsdóttir | febrúar. 20. 2018 | 10:00

Nýju stúlkurnar á LET 2018: Julia Engström (17/25)

Golf 1 mun nú kynna þær stúlkur sem hlutu fullan keppnisrétt á Evrópumótaröð kvenna, en lokaúrtökumótið fór fram í Marokkó í 16.-20. desember 2017.

Leiknir voru 5 hringir og voru stúlkurnar 60 að þessu sinni sem kepptu um kortið sitt, þ.á.m. Guðrún Brá Björgvinsdóttir, GK.

Það voru 25 efstu stúlkurnar sem komust á LET og baráttan í ár var hörð.

T.a.m. voru 6 stúlkur jafnar í 24. sætinu á samtals 4 undir pari, 356 höggum og varð að koma til bráðabana milli þeirra því aðeins tvö sæti voru í boði þ.e. það 24. og 25.

Það voru tvær norskar stúlkur sem sigruðu í bráðabananum þ.e. þær Celine Borge og Madeleine Stavnar (báðar með örn á par-5 18. holuna þar sem úrslitin réðust).

Þær 4, sem sátu eftir með sárt ennið voru hin spænska Maria Palacios Siegenthaler; Julie Aime frá Frakklandi; Kiran Matharu frá Englandi og Tiia Koivisto frá Finnlandi.

Þessar tvær heppnu stúlkur, sem unnu í bráðabanaum um 24. og 25. sætin hafa nú verið kynntar og eins stúlkurnar 5 sem urðu í 19.sæti en það eru Ariane Provot frá Frakklandi; Katja Pogacar frá Slóveníu; Ainil Bakar frá Bandaríkjunum; Sideri Vanova frá Tékklandi og Lucrezia Colombotto Rosso frá Ítalíu. Eins hafa þrjár stúlkur sem urðu í 16. sæti á samtals 6 undir pari, 354 höggum verið kynntar: Elia Folch frá Spáni; Cloe Frankish frá Englandi og Sanna Nuutinen frá Finnandi. Næst voru þær sem deildu 14. sætinu kynntar: Mireia Prat og Piti Martinez Bernal, en báðar léku þær á samtals 7 undir pari, 353 höggum.

Fimm stúlkur deildu 9. sætinu, en það eru: Julía Engström og Cajsa Persson frá Svíþjóð; Vikki Laing frá Skotlandi; Laura Sedda frá Ítalíu og Elína Nummenpää frá Finnlandi. Þær léku allar á samtals 8 undir pari, 352 höggum. og hafa allar verið kynntar nema Julia Engström, sem kynnt verður í dag.

Julia Engström fæddist 27. mars 2001 og er því aðeins 16 ára.

Hún lærði golf af foreldrum sínum aðeins 2 ára og var búin að fá fyrsta golfsettið sitt 4 ára.

Júlía fylgdist með Solheim Cup í heimabæ sínum Halmstad í Svíþjóð aðeins 6 ára og eftir það var ekki aftur snúið – harðar æfingar og við 13 ára aldurinn var hún orðin „scratchari“ (með O í forgjöf).

Árið 2014 þegar Júlía var 13 ára spilaði hún í fyrsta sinn á LET eftir ða hafa fengið boð styrktaraðila til að taka þátt í Helsingborg Open í Vasatorp Golf Club. Linda Wessberg, sem var í 2007 Solheim Cup liði Evrópu var mentorinn hennar.

Árið 2o16, þegar Júlía var 15 ára varð hún sú yngsta til þess að sigra á British Ladies Amateur Golf Championship og hlaut þar með einnig þátttökurétt á Opna bandaríska kvenrisamótinu 2016, Opna breska kvenrisamótinu og Evian Championship það ár.

Og núna aðeins 16 ára er Julia komin með full spilaréttindi á LET, meðan aðrar jafnöldrur eru enn að spila í unglingamótunum!

Julia var sú yngsta í ár til þess að hljóta kortið sitt á LET.