Ragnheiður Jónsdóttir | janúar. 25. 2018 | 14:00

Nýju stúlkurnar á LET 2018: Ariane Provot (3/25)

Golf 1 mun nú kynna þær stúlkur sem hlutu fullan keppnisrétt á Evrópumótaröð kvenna, en lokaúrtökumótið fór fram í Marokkó í 16.-20. desember 2017.

Leiknir voru 5 hringir og voru stúlkurnar 60 að þessu sinni sem kepptu um kortið sitt, þ.á.m. Guðrún Brá Björgvinsdóttir, GK.

Það voru 25 efstu stúlkurnar sem komust á LET og baráttan í ár var hörð.

T.a.m. voru 6 stúlkur jafnar í 24. sætinu á samtals 4 undir pari, 356 höggum og varð að koma til bráðabana milli þeirra því aðeins tvö sæti voru í boði þ.e. það 24. og 25.

Það voru tvær norskar stúlkur sem sigruðu í bráðabananum þ.e. þær Celine Borge og Madeleine Stavnar (báðar með örn á par-5 18. holuna þar sem úrslitin réðust).

Þær 4, sem sátu eftir með sárt ennið voru hin spænska Maria Palacios Siegenthaler; Julie Aime frá Frakklandi; Kiran Matharu frá Englandi og Tiia Koivisto frá Finnlandi.

Þessar tvær heppnu stúlkur, sem unnu í bráðabanaum um 24. og 25. sætin hafa nú verið kynntar og í dag verður byrjað að kynna  eina af fimm sem urðu í 19. sæti, en stúlkurnar sem deildu 19. sætinu eru: Ariane Provot frá Frakklandi; Katja Pogacar frá Slóveníu; Ainil Bakar frá Bandaríkjunum; Sideri Vanova frá Tékklandi og Lucezia Colombotto Rosso frá Ítalíu.

Allar léku þessar stúlkur á samtals 5 undir pari, 355 höggum.

Byrjað verður að kynna Ariane Provot.

Ariane Provot fæddist í Metz, Frakklandi, 29. júní 1992 og er því 25 ára.

Hún býr í dag í París og segir pabba sinn hafa haft mest áhrif á golfið sitt, en hún byrjaði að spila 8 ára þegar hann fór með hana út á völl.

Uppáhaldskylfing sinn segir hún vera Anniku Sörenstam og uppáhaldsgolfvöll sinn segir hún vera Gofl de Ciberta í Frakklandi.

Ariane gerðist atvinnumaður í golfi 1. desember 2013.

Hún komst á LET þegar í fyrstu tilraun 2016 og hefir þurft í Q-school, allt frá því í árslok 2015, en alltaf tekist að næla sér í kortið sitt!

Áhugamálin utan golfsins eru að teikna og vera í ræktinni.