Nýju stúlkurnar á LET 2017: Luna Sobron (41/66)

Lokaúrtökumót LET fór fram á golfvöllum í Samanah og Almelkis golfklúbbana í Marokkó, dagana 17.-21. desember 2016 og voru spilaðir hefðbundnir 5 hringir.

Efstu 30 í lokaúrtökumóti LET, Lalla Aicha Q-school í Marokkó hlutu fullan og næstu 36 þ.e. þær sem höfnuðu í sætum 31-66 takmarkaðan spilarétt.

Stoltið okkar, sú sem hafnaði í 2. sæti, Valdís Þóra Jónsdóttir, hefir þegar verið kynnt en nú verður hafist handa við að kynna hinar.

Nú erum við að byrja að kynna þær heppnu, sem höfnuðu í 21. sæti og hlutu fullan spilarétt á LET; en það voru 4 stúlkur sem allar léku á 3 undir pari, 357 höggum, hver.

Þetta eru þær Neha Tripathi frá Indlandi (72 69 69 76 75); Luna Sobron frá Spáni (73 74 69 68 73); Elia Folch frá Spáni (75 71 72 70 69) og Yan Liu frá Kína (69 73 70 69 76).

Neha Tripathi frá Indlandi og Yan Liu frá Kína hafa þegar verið kynntar og í dag er það Luna Sobron frá Spáni.

Luna Sobron fæddist 22. maí 1994 og er því 22 ára.

Hún býr á Palma de Mallorca á Spáni og segir pabba sinn hafa haft mest áhrif á golfferil sinn.

Uppáhaldslið Sobron er Real Madrid og uppáhaldsgolfvöllur Turnberry.

Sobron gerðist atvinnumaður í golfi 19. september á sl. ári 2016.

Og eins og segir er hún þegar komin með fullan keppnisrétt á LET í fyrstu tilraun sinni á lokaúrtökumótinu!