Nýju stúlkurnar á LET 2015: Louise Stahle (27/34)

Þann 17.-21. desember 2014 fór fram lokaúrtökumót fyrir Evrópumótaröð kvenna í Samanah Al Maaden golfklúbbnum í Marokkó.

Nánar tiltekið 2015 Lalla Aicha Tour School Final Qualifying eins og mótið heitir á ensku.

Meðal þátttakenda á lokaúrtökumótinu í ár voru tveir íslenskir kvenkylfingar Ólafía Þórunn Kristinsdóttir, GR og Valdís Þóra Jónsdóttir, GL, en þær komust því miður ekki í hóp þeirra sem hlutu keppnisrétt á LET 2015.

Golf 1 mun, eins og undanfarin ár kynna allar stúlkur sem hlutu keppnisrétt á Evrópumótaröð kvenna (ens. Ladies European Tour skammst. LET) í gegnum lokaúrtökumótið, en í þetta sinn voru þær 34.

Nú hafa allar stúlkur verið kynntar sem urðu í 9.-34. sætinu.

Næst verður kynnt Louise Stahle frá Svíþjóð sem varð ein í 8. sætinu í Q-school.

Hún lék á samtals 6 undir pari, skorinu 354 höggum (69 71 71 69 74) og er því með fullan keppnisrétt á LET.

Louise Stahle fæddist í Lundi, Svíþjóð, 19. mars 1985 og er því 29 ára.

Hún átti mjög farsælan áhugamannsferil.

Árið 2002 sigraði Stahle á French Open Amateur Championship. Hún var jafnframt í 2. sæti á Girls British Open 2002 og var í Junior Solheim Cup liði Evrópu sem tapaði það ár fyrir Bandaríkjamönnum. Árið eftir þ.e. 2003 var hún líka í Junior Solheim Cup liði Evrópu þegar mótið fór fram í Svíþjóð.

Árið 2004 vann Stahle the St Rule Trophy, the Beirut Café Ladies Trophy og the Telia Tour. Eins sigraði hún the Smyth Salver en hún var besti áhugamaðurinn sem þátt tók í Weetabix Women’s British Open og eins varð hún fyrsti Svíinn til þess að sigra í Ladies’ British Open Amateur Championship. Hún varð einnig fyrsti leikmaðurinn í 30 ár til þess að verja titilinn þegar hún sigraði aftur í mótinu árið 2005. Stahle var í sænska golflandsliðinu 2001–2005 og eins var hún hluti af liði Svía árið 2004 á Espirito Santo Trophy World Amateur Golf Team Championships en þar bar lið Svía sigur af hólmi í kvennaflokki.

Stahle var í bandaríska háskólagolfinu og spilaði með liði Arizona State University þar sem hún átti eitt besta nýliðaár í sögu skólans, en m.a. vann hún the Wildcat Invitational og PING/ASU Invitational. Stahle var útnefnd National Golf Coaches Association Eleanor Dudley Division I leikmaður ársins sem og nýliði ársins og var tilnefnd í All-American First team og Scholar team. Hún var Pac-10 Golfer of the Year og nýliði ársins, vann Pac-10 championship og var tilnefnd í All-Pac-10 first team. Stahle vann líka the GolfstatCup, sem veittur er þeim leikmanni sem hefir besta meðaltalsskor versus par eftir 20 leikin mót á tímabili.

Atvinnumennskan
Stahle gerðist atvinnumaður í golfi fyrir 10 árum, þ.e. 2005 eftir að hafa náð T-8 árangri á Weetabix Women’s British Open en fyrsta mót sem hún lék í sem atvinnumaður var the Scandinavian TPC hosted by Annika í Svíþjóð. Hún fékk undanþágu til að spila á LPGA 2006 eftir að hafa orðið í 11. sæti í Q-school LPGA.

Á árunum 2006 til 2011 spilaði Stahle í 56 LPGA Tour mótum en besti árangurinn var 8. sætið árið 2009 á Sybase Classic. Árið 2006, tryggði Louise sér rétt til að spila á Ladies European Tour (LET) og spilaði í 49 mótum á þeirri mótaröð á árunum 2007 og 2012. Annað sætið í he Ladies Open of Portugal (2007) og the Ladies German Open (2008) er besti árangur hennar á LET.

Árið 2015, mun Stahle snúa aftur til keppni bæði á LPGA Tour Ladies European Tour eftir að hafa tekið þátt í lokaúrtökumótum beggja mótaraða með góðum árangri.