Nýju stúlkurnar á LET 2013: Laura Cabanillas – (23. grein af 43)

Það voru 42 stúlkur sem hlutu kortin sín á LET, þ.e. Evrópumótaröð kvenna á lokaúrtökumóti Q-school LET, m.ö.o. Lalla Aicha Tour School 2013, sem fram fór í Amelkis golfklúbbnum og Al Maaden golfstaðnum í Marrakech, Marokkó, dagana 13.-17. desember s.l.  Þar af hlutu 30 efstu eða þær sem jafnar voru í 30. sætinu fullan keppnisrétt og nokkuð fleiri takmarkaðri spilarétt. Golf 1 tók þær stefnu að kynna líka hluta þeirra sem hlutu takmarkaðri spilarétt þ.e. stúlkurnar sem urðu jafnar í 31. sæti og voru 1 höggi frá því að hljóta fullan keppnisrétt og þær sem voru 3 höggum frá því og deildu 36. sætinu. Þær hafa allar verið kynntar ásamt kanadíska frægðarhallarkylfingnum Lori Kane, sem spilar á LET á undanþágu.

Þær 6 stúlkur, sem deildu með sér 25. sætinu, hafa einnig allar verið kynntar og undanfarna daga hefir hafist kynning á þeim 5, sem deildu með sér 20. sætinu.  Það eru þær: Elina Nummenpaa, Laura Cabanillas, Maha Haddioui, Virginia Espejo og Sarah King. Nú þegar hafa Sarah King, Virginia Espejo og  Maha Haddoui verið kynntar og í kvöld er það Laura Cabanillas.

Laura Cabanillas

Laura Cabanillas fæddist 11. júlí 1981 í Malaga á Spáni og er því 31 árs. Laura gerðist atvinnumaður 4. október 2001. Hún var í spænska unglingalandsliðinu.  Cabanillas hefir átt fast sæti á LET frá 2002, en nú í janúar 2012 rétt slapp hún með skrekkinn og inn á mótaröðina þegar hún varð efst af 6 stúlkum, sem lentu í umspili um fullan keppnisrétt á LET 2012.  Nú í Lalla Aicha Tour School 2013 rétt slapp hún í að verða meðal 5 stúlkna sem deildu 20. sætinu og er aftur komin með fullan keppnisrétt á LET 2013.

 Besta ár Lauru Cabanillas á LET er 2007. Áhugamál Lauru eru stangveiðar, að lesa, synda og fara í bíó.