Nýju stúlkurnar á LET 2012 (2. grein af 34): Hannah Burke

Hannah Burke er ein af þeim 6 sem deildu 29. sæti á lokaúrtökumóti Q-school LET  2012 og þ.a.l. ein af þeim 6, sem varð að fara í bráðabana til að fá úr því skorið hver hlytu síðustu tvö kortin á LET fyrir keppnistímabilið 2012, þ.e. fyrir 29. og 30. sæti, en aðeins 30 efstu af 101 stúlku sem þátt tók í lokaúrtökumótinu hlaut kortið sitt í flokki 8a og þar með fullan keppnisrétt á Evrópumótaröð kvenna.

Hannah var þar áður búin að sigra  í undarúrtökumótinu, þ.e. í B-hóp á 1. stiginu,  sem Tinna „okkar“ Jóhannsdóttir tók þátt í.  Lokaskor Hönnuh þar var  11 undir pari  (74, 69, 67, 67). Sjá úrslit í B-hóp á 1. stiginu með því að SMELLA HÉR: 

En hver er Hannah að öðru leyti?  Hannah Burke fæddist 28. mars 1988 í London og er því 24 ára.  Hún hefir spilað golf frá því hún var 10 ára. Burke spilaði í bandaríska háskólagolfinu með liði Baylor 2006 -2010 og á sama tíma var hún í enska landsliðinu. Árið 2010 var hún í 7. sæti yfir áhugamenn í Evrópu og lauk ferlinum í bandaríska háskólagolfinu, sem sú 37. besta í háskólagolfinu yfir öll Bandaríkin.  Hún var í liði Englands í European Team Championships og á heimsmótinu í Argentínu, þar sem skorið hennar skipti sköpum fyrir árangur liðsins.

Eftir fyrsta ár sitt í Bandaríkjunum voru Burke veitt nýliðaverðlaun, en hún var m.a. sú sem réði úrslitum í því að lið hennar komst í svæðiskeppnina (ens.: regionals) í Michigan. Hún vann fyrsta einstaklingstitil sinn í bandaríska háskólagolfinu í Wolfdancer mótinu, haustið 2007.

Árið 2011 gerðist Hannah atvinnumaður og ávann sér keppnisrétt á LPGA Futures Tour. Engu að síður spilaði hún í Q-school LET í janúar á þessu ári til þess að öðlast aukinn keppnisrétt – og rétt missti af fullum keppnisrétti á LET í umspilinu.

Til þess að komast á heimasíðu Hönnuh Burke SMELLIÐ HÉR: 

Hannah Burke er með sína eigin fatalínu og til þess að sjá hana SMELLIÐ HÉR: