Nýju strákarnir á PGA Tour 2019: Sebastian Muñoz (19/50)

Eins og á undanförnum árum mun Golf 1 kynna „Nýju strákana“ á PGA Tour keppnistímabilið 2018-2019 til sögunnar, en það eru sem fyrr efstu 25 á peningalista Web.com Tour eftir 2017-2018 keppnistímabilið og síðan þeir 25 sem stóðu sig best í síðustu 4 mótunum á mótaröðinni þ.e. í Web.com Finals.

Fyrst verður byrjað að kynna þá 25 sem urðu efstir á peningalista Web.com Tour eftir reglulega tímabilið og verður nú kynntur sá sem varð í 7. sæti peningalistans, Sebastian Muñoz. Eftir að efstu 25 á peningalista Web.com Tour hafa verið kynntir verða þeir 25 kynntir sem urðu efstir á Web.com Finals.

Sebastian Muñoz fæddist 4. janúar 1993 í Bogotá, Kólombíu og er því 25 ára, sonur  Ricardo Muñoz og María Fernanda Amaya.

Muñoz er 1,83 á hæð.

Hann átti farsælan áhugamannaferil; sigraði m.a. í eftirfarandi mótum:

2010 Copa Joaquin y Tomas Samper Brush, Canadian International Junior Challenge
2012 Abierto de Golf Ciudad de Ibague, Abierto de Golf
2013 Torneo Aficionado Segunda Semana
2014 Abierto de Golf Ciudad de Ibague, Abierto de Golf Bucaramanga, Jim Rivers Intercollegiate
2015 Conference USA Championship

Sebastian Muñoz spilaði í bandaríska háskólagolfinu með liði University of North Texas. Þar vann hann m.a. 2 einstaklingskeppnir á lokaári sínu m.a. Conference USA Championship. Strax eftir útskrift 2015 í „Business Administration and Entrepreneurship“ gerðist hann atvinnumaður í golfi og hefir frá þeim tíma spilað á PGA Tour Latinoamérica og Web.com Tour.

Árið 2015 sigraði hann í tveimur mótum PGA Tour Latinoamérica, heima fyrir í Kólombíu: 2015 Abierto de Buracamanga og Abierto de Club Campestre Medellín.

Á Web.com sigraði hann m.a. í 1 móti 7. febrúar 2016: Club Colombia Championship, þar sem hann spilaði í boði styrktaraðila. Þannið hlaut hann kortið sitt á Web.com Tour og varð fyrsti kólombíski kylfingurinn til að sigra á mótaröðinni. Hann varð í 22. sæti peningalistans 2016 og hlaut þannig í fyrsta sinn kortið sitt á PGA Tour.

Árið 2017 tók hann þátt í Opna breska en komst ekki í gegnum niðurskurð og 2018 keppti hann í Opna bandaríska og sama sagan þar, hann komst ekki í gegnum niðurskurð.

Á 2018 keppnistímabilinu varð hann 6 sinnum meðal efstu 10 í mótum Web.com og það dugði til þess að hann næði 7. sæti peningalistans og er þar með kominn með fullan spilarétt á nýjan leik á PGA Tour, mótaröð þeirra bestu 2019.

Sem stendur er Muñoz nr. 297 á heimslistanum.