Ragnheiður Jónsdóttir | maí. 18. 2019 | 18:00

Nýju strákarnir á PGA Tour 2019: Matt Jones (43/50)

Eins og á undanförnum árum mun Golf 1 kynna „Nýju strákana“ á PGA Tour keppnistímabilið 2018-2019 til sögunnar, en það eru sem fyrr efstu 25 á peningalista Web.com Tour eftir 2017-2018 keppnistímabilið og síðan þeir 25 sem stóðu sig best í síðustu 4 mótunum á mótaröðinni þ.e. í Web.com Finals.

Nú hafa verið kynntir þeir 25, sem urðu efstir á peningalista Web.com Tour eftir reglulega tímabilið og hlutu þannig kortin sín á mótaröð þeirra bestu, PGA Tour, síðast var kynntur sá sem varð í 1. sæti peningalistans, Sungjae Im frá Suður-Kóreu.

Nú er aðeins eftir að kynna þá 25, sem urðu efstir á Web.com Finals og hlutu þannig þáttökurétt á mótum PGA Tour. Fyrst var kynntur sá sem rétt slapp í hóp þeirra 25 efstu en það var Jim Knous, síðan Fabián Gómez frá Mexíkó, kanadíski kylfingurinn Ben Silverman, bandarísku kylfingarnir Michael Hayes Thompson, Nicholas Lindheim, Wes Roach og Cameron Tringale, Curtis Luck (16. sæti) frá Ástralíu, Dylan Frittelli frá S-Afríku og Sepp Straka frá Austurríki; Stephan Jäger, sem varð í 15. sæti; Roberto Diaz, sem varð í 14. sæti ; Max Homa, sem varð í 13. sæti Seth Reeves, sem var í 12. sæti og Hunter Mahan, sem varð í 9. sæti.

Í dag verður kynntur sá sem var í 8. sæti á Web.com Tour Finals, en það er Matt Jones, sem vann sér inn 112,000 dollara á Web.com Finals.

Matt Jones fæddist 19. apríl 1980 í Sydney, Ástralíu og er því 39 ára.

Hann er 1,78 m á hæð og 77 kg.

Jones er kvæntur Melissu Weber Jones (frá árinu 2010) – sem var Miss Idaho 2009 – og á tvö börn: Savönnuh og Saber.

Matt Jones lék í bandaríska háskólagolfinu með liði Arizona State University.

Árið 2001 gerðist Jones atvinnumaður í golfi.

Hann á 2 sigra í beltinu sem atvinnumaður; sá fyrri kom 6. apríl 2014 en þar sigraði Jones eftir bráðabana við Matt Kuchar á Shell Houston Open á PGA Tour.

Seinni sigur Jones sem atvinnumanns kom á Ástralasíu túrnum 29. nóvember 2015 þ.e. á Emirates Australian Open.

Besti árangur Jones í risamóti er T-21 árangur í PGA Championship 2015.